24.38 లక్షల కుటుంబాలకు లబ్ధి
నాలుగో విడత ఉచిత సరుకుల పంపిణీ ప్రారంభం
పోర్టబిలిటీ ద్వారా సరుకులు తీసుకున్న 6 లక్షల మంది వలసదారులు
సాక్షి, అమరావతి: పేదలను ఆదుకునేందుకు ప్రభుత్వం ప్రతిష్టాత్మకంగా అమలు చేస్తున్న ఉచిత సరుకుల పంపిణీ శనివారం ప్రారంభమైంది. తొలి రోజు 24.38 లక్షల కుటుంబాలకు రేషన్‌ అందింది. ఇందులో వలస వెళ్లిన, అవసరాల నిమిత్తం వెళ్లి ఇతర ప్రాంతాల్లో నిలిచిపోయిన 6 లక్షల మంది లబ్ధిదారులు పోర్టబిలిటీ ద్వారా సరుకులు 
తీసుకున్నారు. శనివారం ఒక్కరోజే 30,996.533 మెట్రిక్‌ టన్నుల బియ్యం, 1,664.344 మెట్రిక్‌ టన్నుల శనగలు పంపిణీ చేశారు.
ఉపాధి లేని వేళ..
► లాక్‌డౌన్‌ సమయంలో ఉపాధి కోల్పోయిన పేదలు ఆహారం కోసం ఇబ్బందులు పడకుండా ప్రభుత్వం ఒక్కో వ్యక్తికి 5 కిలోల బియ్యం, కిలో కందిపప్పు లేదా శనగలు ఉచితంగా పంపిణీ చేస్తున్న విషయం తెలిసిందే.
► లాక్‌డౌన్‌ మొదలైనప్పటి నుంచి ఇప్పటికే 3 విడతలుగా సరుకులు ఉచితంగా పంపిణీ చేసిన విషయం తెలిసిందే. నాలుగో విడత పంపిణీ శనివారం నుంచి ప్రారంభమైంది.
► రాష్ట్రంలో 1.48 కోట్ల కుటుంబాలకు రేషన్‌ కార్డులున్నాయి. కరోనా వైరస్‌ వ్యాప్తి చెందకుండా ఒక్కో రేషన్‌ షాపులో రోజుకు 30 మందికే టోకెన్లు జారీ చేశారు.
► టైం స్లాట్‌తో కూడిన కూపన్లు ముందుగా ఇవ్వడం వల్ల పంపిణీ సాఫీగా సాగుతోంది. కార్డుదారుల వేలి ముద్రలు నమోదు చేస్తున్నందున లబ్ధిదారులు చేతులు శుభ్రం చేసుకునేందుకు వీలుగా ప్రతిచోట శానిటైజర్లను అందుబాటులో ఉంచారు.
