బాస్‌లే కాదండోయ్‌.. మనం కూడా అసిస్టెంట్‌ను పెట్టుకోవచ్చు. అదేలా అనుకుంటున్నారా? స్మార్ట్‌ఫోన్‌లో అండి. టెక్నాలజీ దిగ్గజ కంపెనీ గూగుల్‌ ఇప్పటికే ‘గూగుల్‌ అసిస్టెంట్‌’ పేరుతో ఒక యాప్‌ను అందుబాటులోకి తీసుకువచ్చింది. ఇది ఆర్టిఫీషియల్‌ ఇంటెలిజెన్స్‌ ఆధారంగా పనిచేస్తుంది. ఈ యాప్‌ను గూగుల్‌ ప్లేస్టోర్‌ నుంచి ఉచితంగా డౌన్‌లోడ్‌ చేసుకోవచ్చు. గూగుల్‌ అసిస్టెంట్‌ పలు స్మార్ట్‌ఫోన్లలో డిఫాల్ట్‌గా కూడా ఉండొచ్చు. ఫోన్‌ హోమ్‌ బటన్‌ను నొక్కి పట్టుకుంటే ఇది ఓపెన్‌ అవుతుంది.
ప్రత్యేకతలు
♦ ఏదైనా పనిలో ఉన్నా.. డ్రైవింగ్‌లో ఉన్నా.. త్వరితగతిన ఫోన్‌ కాల్స్‌ చేయవచ్చు. కాల్‌ మామ్‌ అని చెబితే వెంటనే అమ్మకు ఫోన్‌ కాల్‌ వెళ్తుంది.
♦ అలాగే మెసేజ్‌లను కూడా పంపుతుంది.
♦ స్నేహితుడి పుట్టిన రోజుకు బహుమతి కొనాలి అనుకుంటే.. ఆ బర్త్‌డే ఎప్పుడో రిమైండ్‌ సెట్‌ చేసుకోవచ్చు. దీనిలాగే ఇతర ముఖ్యమైన అంశాలను రిమైండ్‌లో పెట్టుకోవచ్చు. టేక్‌ సెల్ఫీ అని చెబితే సెల్ఫీ తీసి పెడుతుంది.
♦ క్యాలెండర్‌ ఈవెంట్లను సెట్‌ చేసుకోవచ్చు.
♦ రూట్‌ డైరెక్షన్స్‌ చెబుతుంది. వాతావరణం గురించి తెలియజేస్తుంది.
♦ యూట్యూబ్‌లో పాటలు ప్లే చేయంటే ప్లే చేస్తుంది.
♦ టెల్‌ మి ద న్యూస్‌ అని చెబితే తాజా వార్తలను తెలియజేస్తుంది.
♦ ఈ యాప్‌ కొత్త ఆండ్రాయిడ్‌ ఓఎస్‌ (6.0 మొదలు) కలిగిన ఫోన్లలోనే పని చేస్తుంది. ఫోన్‌లో గూగుల్‌ అసిస్టెంట్‌ ఉంటే మళ్లీ ఈ యాప్‌ను ప్రత్యేకంగా డౌన్‌లోడ్‌ చేసుకోవాల్సిన అవసరం లేదు.
