టాప్‌లోకి దూసుకొచ్చిన హెచ్‌డీఎఫ్‌సీ బ్యాంకు

సాక్షి, ముంబై: దేశంలో అతిపెద్ద ప్రైవేటు రంగ బ్యాంకు హెచ్‌డీఎఫ్‌సీ మరో ఘనతను తన ఖాతాలో వేసుకుంది. మార్కెట్‌ క్యాప్‌ పరంగా అతిపెద్ద మూడవ భారతీయ సంస్థగా నిలిచింది. తాజాగా బ్యాంక్ రూ.7 లక్షల కోట్ల మార్కెట్ క్యాపిటలైజేషన్‌ను అధిగమించింది. తద్వారా రిలయన్స్‌, టాటా కన్సల్టెన్సీ సర్వీసెస్ తర్వాత మూడవ భారతీయ కంపెనీగా అవతరించింది. అంతేకాదు ఈ ఘనత సాధించిన మొదటి బ్యాంకుగా నిలిచింది. 

ఇప‍్పటివరకూ రిలయన్స్ ఇండస్ట్రీస్ (ఆర్‌ఐఎల్), టీసీఎస్ మాత్రమే ఈ మైలురాయిని సాధించాయి. రూ .9.38 లక్షల కోట్ల మార్కెట్ క్యాపిటలైజేషన్‌తో, ఆర్‌ఐఎల్ అత్యధిక విలువైన సంస్థ, టిసిఎస్ తరువాత రూ.8.28 లక్షల కోట్లు. హెచ్‌డీఎఫ్‌సీ  బ్యాంక్ మార్కెట్ క్యాపిటలైజేషన్ మొదటిసారిగా రూ .7,01,730.21 (7.01 లక్షల కోట్లు)ను తాకింది. 1285 వద్ద 52 వారాల గరిష్ట స్థాయిని చేరిన హెచ్‌డిఎఫ్‌సి బ్యాంక్ షేర్లు  0.7 శాతం పెరిగి బాంబే స్టాక్ ఎక్సేంజ్‌లో రూ .1283.40 వద్ద ట్రేడవుతున్నాయి.