పెళ్లి కుమార్తెపై అకృత్యం

నిడదవోలు/నిడదవోలు రూరల్‌: తెల్లవారితే ఆ యువతికి పెళ్లి. బంధుమిత్రులకు శుభలేఖలు పంచివచ్చారు. ఇంటివద్ద పందిళ్లు వేశారు. వేదికను ప్రత్యేకంగా అలంకరించారు. వివాహ వేళ గీతాలు ఆలపించే బృందాలు సైతం వేదిక వద్దకు చేరుకున్నాయి. ఆ ఇల్లంతా బంధుమిత్రుల సందడితో కళకళలాడుతోంది. ఎవరికి వారు పెళ్లి ఏర్పాట్లలో నిమగ్నమయ్యారు. ఆదివారం రాత్రి 11 గంటల సమయంలో పెళ్లికుమార్తె ఇంటికి సమీపాన బహిర్భూమికి వెళ్లింది. ఎంతసేపటికీ తిరిగిరాకపోవడంతో తల్లిదండ్రులు, బంధువుల్లో ఆందోళన మొదలైంది. ఊరంతా వెతికారు. ఇంటింటికీ వెళ్లి ఆరా తీశారు. తెల్లారినా పెళ్లికుమార్తె ఆచూకీ తెలియరాలేదు. ఏమైందో తెలియని పరిస్థితుల్లో చుట్టపక్కల వాళ్లంతా ఏవేవో మాట్లాడుకుంటున్నారు. వివాహ సమయం మించిపోయింది. పెళ్లికొచ్చిన బంధువులు, మిత్రులు అక్కడే వేచివున్నారు. వారిలో ఎడతెగని ఉత్కంఠ నెలకొంది. కుటుంబ సభ్యులు చెట్టుపుట్టా తిరుగుతూ వెతుకుతూనే ఉన్నారు.

మధ్యాహ్నం ఒంటిగంట సమయంలో గ్రామ శివారులోని చెరకు తోటలో పెళ్లి కుమార్తె తీవ్ర గాయాలతో.. అపస్మారక స్థితిలో పడివుంది. వెంటనే నిడదవోలులోని ప్రభుత్వాసుపత్రికి తరలించగా.. ప్రాథమిక చికిత్స అందించారు. కొద్దిగా స్పృహలోకి వచ్చిన యువతి నోరు పెగల్చుకుని జరిగిన విషయం చెప్పింది. మృగాడి ఘాతుకానికి బలైందని తెలిసి ఆమె తల్లిదండ్రులు, బంధువులు బావురుమన్నారు. వివాహ వేదిక వద్ద వేచివున్న జనమంతా ఆసుపత్రికి చేరుకుని ఆవేదనకు గురయ్యారు. పరిస్థితులు అనుకూలంగా లేకపోవడంతో చివరకు పెళ్లిని నిలిపివేశారు. ఈ దురాగతం పశ్చిమగోదావరి జిల్లా నిడదవోలు పట్టణానికి మూడు కిలోమీటర్ల దూరంలో చోటుచేసుకుంది. ఆ గ్రామంలో విషాద ఛాయలు అలముకున్నాయి.