గొల్లుమన్న పొనుగుటివలస

రాజాం :రాజాం నగర పంచాయతీ పరిధి పొనుగుటివలస గ్రామంలో సోమవారం మధ్యాహ్నం సంభవించిన అగ్నిప్రమాదంలో 13 పూరిళ్లు దగ్ధమయ్యాయి. ఈ సంఘటనలో సుమారు పది లక్షల రూపాయల ఆస్తినష్టం సంభవించింది. గ్రామస్తులంతా వ్యవసాయ పనుల నిమిత్తం పొలాల్లో ఉన్న సమయంలో ప్రమాదం సంభవించడం, విషయం తెలిసి పరుగున వచ్చేసరికే ఇళ్లన్నీ కాలిపోవడంతో బాధితులంతా కట్టుబట్టలతో మిగిలారు. వీరంతా నిరుపేదలు కావడం, ఇళ్లు, తిండిగింజలు కాలిపోవడంతో వారంతా వీధినపడ్డారు. మంటలను అదుపు చేసే క్రమంలో మాసాబత్తుల అప్పారావు ఇంటిలోని గ్యాస్ సిలిండర్‌ను బయటకు తీసుకువచ్చారు. ఇంతలో అది పేలడంతో ఆ ధాటికి పక్కనే ఉన్న గేదె దూడ మృతి చెందింది. ప్రమాద సమాచారం తెలుసుకున్న రాజాం అగ్నిమాపక కేంద్రం సిబ్బంది వచ్చి మంటలను అదుపు చేశారు.