ఇంటిలోనే పాముల పుట్టలు

సాలూరురూరల్(ఒడిశా)‌: పొలం గట్లపై పాముల పుట్టలు ఉంటేనే అటువైపుగా వెళ్లేందుకు భయపడతాం.. దూరంగా నడుస్తాం.. అలాంటిది మండలంలోని గాంజాయిభద్ర పంచాయతీ పరిధిలోని పనుకులోవలో ఓ ఇంటిలోనే పాములు పుట్టలు కనిపిస్తాయి. అందులో నాగవేవత(నాగుపాము) ఉంటుందని నమ్ముతారు. నిత్యం ఇంటిలోనే పుట్టలకు పూజలు చేస్తారు. పుట్టలో పాలుపోస్తారు. ఇంటి నుంచి బయటకు వెళ్లినా, ఏ కార్యం జరగాలన్నా నాగమ్మను కొలుచుకుని బయటకు వెళ్తారు. ఉదయం వేళల్లో ఇంటి పెడకలో, సమీప అడవిలోకి నాగమ్మ వెళ్తుందని,  రాత్రి వేళల్లో పుట్టలోకి రావడం, లేదంటే ఇంటిలో ఏదైనా ఓ స్థలంలో మండివేసి ఉంటుందని ఇంటి యజమాని కనుపూరి చెప్పారు.

నాగమ్మ(పాము) ఎదురైనా నెమ్మదిగా వెళ్లిపోతుందని, ఎవ్వరికి ఏ హాని చేయదని చెబుతున్నారు. అనాదిగా ఇంటిలో పుట్టలు ఉన్నాయని, అందులో నాగమ్మ ఉంటుందని, ఇప్పటి వరకు ఎవ్వరికి ఏ హాని చేయలేదని తెలుపుతున్నారు. చాలా పెద్ద నాగదేవత ఉన్న ఈ పుట్టకు గ్రామస్తులంతా వచ్చి పూజలు చేస్తుంటారు. స్థానికంగా నిర్మించిన వాటర్‌ట్యాంకును పరిశీలించేందుకు గ్రామానికి వచ్చిన ఆర్‌డబ్ల్యూఎస్‌ ఈఈ గాయత్రిదేవి ఇంటిలోని పుట్టలను చూసి ఆశ్చర్యపోయారు.