నేను ఇంజినీరింగ్ ఫైనల్ ఇయర్ చదువుతున్నాను. మా సీనియర్‌ని రెండు సంవత్సరాలుగా ప్రేమిస్తున్నాను. మా ఇద్దరి మతాలూ వేరువేరు. ఈ కారణంగా మా వివాహానికి మా పేరెంట్స్ అంగీకరించట్లేదు. అతడికి ఇంకా ఉద్యోగం దొరకలేదు. అతడిని వివాహం చేసుకోవడం వల్ల నేను ఇబ్బందులపాలవుతానని మా వాళ్లు అంటున్నారు. సంపన్నుల ఇంటి అబ్బాయిని చేసుకుని, అమెరికాలో ఉండవచ్చు కదా అంటున్నారు. అతడు నన్ను ఎంతగా ప్రేమిస్తున్నాడో నాకు తెలుసు. మా తల్లిదండ్రుల సంపూర్ణ సహకారంతో అతడినే పెళ్లి చేసుకోవాలనుకుంటున్నాను. అందుకు ఒప్పుకోకపోతే నాకు ఆత్మహత్య తప్ప, మార్గం లేదు.
- సాగర్, కరీంనగర్
మొట్టమొదట మీరు తెలుసుకోవలసిన విషయం ఏంటంటే, ప్రతి సమస్యకు ఒక పరిష్కారం ఉంటుంది అంతేకాని ఆత్మహత్య పరిష్కారం అనుకోకండి. తల్లిదండ్రులు ప్రేమను వ్యతిరేకించడం, చాలా కుటుంబాలలో సర్వసాధారణం. మీ తల్లిదండ్రులు మీ గురించి సరిగ్గానే ఆలోచిస్తున్నారని ముందుగా అర్థం చేసుకోండి. ఏ తల్లిదండ్రులైనా వారి పిల్లల్ని ప్రేమిస్తారే కానీ ద్వేషించరు. మీరు నిరాశలో ఉండి, మీ తల్లిదండ్రుల గురించి సరిగా అర్థం చేసుకోవట్లేదు.
ముందుగా ఇటువంటి విషయాలను భావోద్వేగాలతో కాకుండా అనుభవాన్ని దృష్టిలో ఉంచుకుని ఆలోచించాలి. మీ తల్లిదండ్రులు ఎంతో ప్రపంచాన్ని చూశారు. మంచిచెడులు వారికి మీ కంటె బాగా తెలుస్తాయి. మీ వయసులో ఉన్నవారికి... పెళ్లికి ముందు కలిగే ప్రేమ, పెళ్లి తరవాత నిలబెట్టుకోవలసిన ప్రేమకు తేడా తెలియదు. ప్రేమ ఒక ఆకర్షణ మాత్రమే. ఇందులో మునిగిపోయినవారికి అన్నీ కరెక్ట్‌గానే అనిపిస్తాయి. అందువల్లే అన్నిటికీ సర్దుకుపోగలమని అనుకుంటారు. అనుభవంలోకి వస్తేనే కాని సమస్యలను ఎదుర్కోవడం ఎంత కష్టమో తెలియదు.
చాలా ప్రేమ వివాహాలలో ఎదురయ్యే సమస్యలలో మొదటిది... వారు జీవితంలోకి ఎన్నో ఆశలతో, కలలతో ప్రవేశిస్తారు. సర్దుకుపోవడమనేది వారికి తెలియదు. ప్రేమ, పెళ్లి వంటివి సినిమాలలోలాగ నిజ జీవితంలో సాధ్యం కాదు. ఆకర్షణలో పడి వివాహం చేసుకున్నప్పటికీ, జీవితంలో సర్దుకోలేక ఎంతోమంది విడిపోతున్నారు. అందువల్లే చాలామంది తల్లిదండ్రులు ప్రేమ వివాహాల గురించి భయపడుతున్నారు. వివాహబంధం... కలకాలం నిలబడాలే కాని, మధ్యలో తెగిపోయేలా ఉండకూడదు. మీ జీవితం కలకాలం పచ్చగా ఉండాలని తెలుసుకోండి. పైన చెప్పిన విషయాలన్నీ మీ మనసుకి అంగీకారంగా ఉన్నాయో లేదో ఒకసారి పరీక్షించుకోండి. మీ తల్లిదండ్రులతో ప్రశాంతంగా చర్చించండి. సమస్యకు పరిష్కారం లభించకపోతే, ఒక ప్రొఫెషనల్ సహాయంతో సమస్యను మధ్యేమార్గంగా పరిష్కరించుకోండి.
- డాక్టర్ కల్యాణ్‌చక్రవర్తి
సైకియాట్రిస్ట్, మెడిసిటీహాస్పిటల్స్, హైదరాబాద్
