సాక్షి, హైదరాబాద్: రచయిత, సామాజిక కార్యకర్త డాక్టర్ పెండెం కృష్ణకుమార్ మూడో సారి గిన్నిస్ బుక్ రికార్డుల్లోకి ఎక్కారు. నిమిషం వ్యవధిలో కుప్పగా పోసిన 16 జతల షూలను వాటి కరస్పాండింగ్ బాక్స్‌లో ఉంచడంలో ఈ రికార్డు సాధించారు. గతంలో 14 జతలపై జయసింహ పేరిట ఉన్న రికార్డును ఆయన బ్రేక్ చేసి తాజా రికార్డు నెలకొల్పారు.
గతంలోనూ ఆయన వేగంగా ఇంగ్లిష్ అక్షరాలను టైప్ చేయడం, నటనలో రెండుసార్లు గిన్నిస్ రికార్డు సాధించారు. అంతేగాక పలు సామాజిక సేవల్లో ముందున్న కృష్ణ.. విభిన్న పాత్రలు పోషించడంలో మూడు సార్లు లిమ్కా బుక్ రికార్డుల్లోకి ఎక్కారు. నల్లగొండ జిల్లా సూర్యాపేటకు చెందిన కృష్ణ మెడికల్ డిస్ట్రిబ్యూటర్‌గా పనిచేస్తున్నారు.
