మహిళలు, విద్యార్థులు నాశనమవుతున్నారు

4 Jul, 2017 02:46 IST|Sakshi
మహిళలు, విద్యార్థులు నాశనమవుతున్నారు
- ఆన్‌లైన్‌ రమ్మీపై హైకోర్టుకు నివేదించిన సర్కారు 
గ్యాంబ్లింగ్‌తో కంపెనీలు 
కోట్లు వెనకేసుకొంటున్నాయి 
 
సాక్షి, హైదరాబాద్‌: ఆన్‌లైన్‌ రమ్మీ నిర్వహిస్తున్న కంపెనీలు గ్యాంబ్లింగ్‌ ద్వారా వందల కోట్ల రూపాయలు వెనకేస్తున్నాయని తెలంగాణ ప్రభుత్వం సోమవారం ఉమ్మడి హైకోర్టుకు నివేదించింది. హైదరాబాద్‌ కేంద్రంగా పనిచేస్తున్న ఓ సంస్థ గత ఏడాది రూ.623 కోట్లను తమ ఆదాయంగా చూపిందని వివరించింది. ఆన్‌లైన్‌ రమ్మీ ఓ వ్యసనంగా మారిందని, మహిళలు, విద్యార్థులు దీని బారిన పడి జీవితాలు నాశనం చేసుకుంటున్నారని తెలిపింది.

అంతేకాక ఆత్మహత్యలు కూడా చోటు చేసుకుంటున్నాయని, దీనికి సంబంధించి తమకు ఫిర్యాదులు కూడా అందాయంది. ఈ నేపథ్యంలోనే తాము ఆన్‌లైన్‌ రమ్మీని తెలంగాణలో నిషేధిస్తూ ఆర్డినెన్స్‌ తీసుకొచ్చామంది. రమ్మీ నైపుణ్య క్రీడ అయినప్పటికీ, నేర కోణంలో చర్యలు తీసుకునే అధికారం ప్రభుత్వానికి ఉందని, ఈ విషయాన్ని సుప్రీంకోర్టు సైతం స్పష్టం చేసిందని నివేదించింది. తెలంగాణలో ఆన్‌లైన్‌ రమ్మీని నిషేధిస్తూ ప్రభుత్వం తీసుకొచ్చిన ఆర్డినెన్స్‌ను సవాలు చేస్తూ పలు కంపెనీలు హైకోర్టును ఆశ్రయించాయి. 
 
కార్డులు కలపడంలో మోసాలు... 
ఈ వ్యాజ్యాల్లో సోమవారం తెలంగాణ ప్రభుత్వం తరఫున అడ్వొకేట్‌ జనరల్‌ (ఏజీ) కె.రామకృష్ణారెడ్డి వాదనలు ప్రారంభించారు. ఆన్‌లైన్‌ రమ్మీ కంపెనీలు తమ సంస్థకు చెందిన ఉద్యోగులనే ఓ బృందంలో సభ్యులుగా చేర్చి, వారి చేత ఆడిస్తాయని తెలిపారు. కార్టులు కలిపి, పంచే సమయంలో సాంకేతిక పరిజ్ఞానం సాయంతో మోసానికి పాల్పడుతున్నాయన్నారు. ఈ మొత్తం వ్యవహారంలో పెద్ద మొత్తంలో డబ్బు ముడిపడి ఉంటుందని, అయితే ఈ సందర్భంగా వచ్చే ఫిర్యాదులను పరిష్కరించేందుకు ఎటువంటి యంత్రాంగం లేదని తెలిపారు. 24 గంటలూ ఆట అందుబాటులో ఉండటంతో మహిళలు, విద్యార్థులు ఆకర్షితులవుతున్నారన్నారు. వాదనల నిమిత్తం తదుపరి విచారణ మంగళవారానికి వాయిదా పడింది.  
Read latest Hyderabad News and Telugu News
Follow us on FaceBook, Twitter, Instagram, YouTube
తాజా సమాచారం కోసం      లోడ్ చేసుకోండి
మరిన్ని వార్తలు