23,000 ఆటంబాంబుల శక్తి!

24 Dec, 2018 05:55 IST|Sakshi
2004 సునామీలో అసంఖ్యాక మృతులు (ఫైల్‌)

2004 సునామీ సృష్టించిన బీభత్సం

మానవచరిత్రలోనే అతిపెద్ద సునామీగా రికార్డు

దాదాపు 2 లక్షల మంది మృత్యువాత

జకార్తా: ఇండోనేసియాలో 2004, డిసెంబర్‌ 26న వచ్చిన సునామీ మానవచరిత్రలోనే అతిపెద్ద ప్రకృతి విలయాల్లో ఒకటిగా నిలిచింది. ఈ దుర్ఘటనలో 14 దేశాలకు చెందిన 2,30,000 మంది ప్రాణాలు కోల్పోగా, లక్షలాది మంది నిరాశ్రయులయ్యారు. ఈ సునామీ సందర్భంగా హిరోషిమాపై అమెరికా ప్రయోగించిన ఆటంబాంబుకు 23,000 రెట్లు అధికమైన శక్తి విడుదలైందని యూఎస్‌ జియోలాజికల్‌ సర్వే అప్పట్లో తేల్చింది.

డిసెంబర్‌ 26న స్థానిక కాలమానం ప్రకారం ఉదయం 7.59 గంటలకు సుమిత్రా ద్వీపం వద్ద సముద్ర గర్భంలో శక్తిమంతమైన భూకంపం సంభవించింది. ఈ సందర్భంగా రిక్టర్‌ స్కేలుపై 9 శాతం తీవ్రత నమోదైంది. సముద్ర గర్భంలో ఇండియా ప్లేట్, బర్మా ప్లేట్‌ల మధ్య ఘర్షణ ఏర్పడటంతో 1000 కిలోమీటర్ల పొడవు, పది మీటర్ల లోతు మేర చీలిక ఏర్పడింది. దీంతో సముద్రంలో ఒక్కసారిగా నీళ్లు అతిభారీ పరిమాణంలో స్థానభ్రంశం చెందాయి. ఇది జరిగిన కొన్నిగంటల్లోనే తీరంవైపు శక్తిమంతమైన రాకాసి అలలు దూసుకొచ్చాయి.

హిందూ మహాసముద్రంలోని 11 దేశాల్లోని తీర ప్రాంతాలను ఈ అలలు కకావికలం చేశాయి. ఈ సందర్భంగా సముద్ర గర్భంలో భూకంపం ఎంత తీవ్రంగా వచ్చిందంటే సునామీ అలలు దాదాపు 5,000 కి.మీ వరకూ ప్రయాణించి ఆఫ్రికా తీరంలో సైతం తీవ్రనష్టాన్ని కలుగజేశాయి. దీని ప్రభావంతో చాలాచోట్ల అలలు 50 అడుగుల ఎత్తులో తీరాన్ని ముంచెత్తాయి. సాధారణంగా సునామీ వచ్చినప్పుడు ఓ అల తీరాన్ని తాకివెళ్లిన తర్వాత మరో అల వస్తుంది.

ఇలా ఐదు నిమిషాల నుంచి గంట వ్యవధిలో రాకాసి అలలు తీరాన్ని తాకుతూనే ఉంటాయి. ఈ విషయం తెలియని చాలామంది 2004 సునామీ సందర్భంగా మొదటి అల నుంచి తప్పించుకున్నప్పటికీ ప్రాణాలు దక్కించుకోలేకపోయారు.. సునామీ తాకిడికి మాల్దీవుల్లో ప్రకృతిసిద్ధంగా ఏర్పడిన పగడపు దిబ్బలు తుడిచిపెట్టుకుపోయాయి. సునామీ సందర్భంగా భారీగా ప్రాణనష్టం సంభవించినప్పటికీ కొంచెం అవగాహనతో ప్రాణాలు కాపాడుకున్నవారు సైతం ఉన్నారు. 2004 సునామీ సందర్భంగా ఓ విద్యార్థిని థాయ్‌లాండ్‌లోని సముద్రతీరంలో ఉండగా నీళ్లు ఒక్కసారిగా వెనక్కు వెళ్లిపోయాయి.

పాఠశాలలో సునామీపై చెప్పిన పాఠాన్ని గుర్తుకుతెచ్చుకున్న ఆమె తల్లిదండ్రులను అప్రమత్తం చేసింది. దీంతో వారందరూ ప్రాణాలతో బయటపడ్డారు. ఇక సునామీపై నేషనల్‌ జియోగ్రాఫిక్‌ ఛానల్‌లో ఓ కార్యక్రమాన్ని వీక్షించిన భారతీయుడు సముద్రం వెనక్కి వెళ్లడంతో ఊరి ప్రజలను అప్రమత్తం చేసి 1,500 మందిని కాపాడగలిగాడు. ఈ ప్రకృతి విపత్తు సందర్భంగా చాలా జంతువులు తీరానికి దూరంగా ఎత్తైన ప్రాంతానికి పారిపోవడాన్ని తాము చూసినట్లు చాలామంది ప్రత్యక్ష సాక్షులు తెలిపారు.

Read latest International News and Telugu News
Follow us on FaceBook, Twitter
తాజా సమాచారం కోసం      లోడ్ చేసుకోండి
Load Comments
Hide Comments
మరిన్ని వార్తలు
సినిమా