వర్జీనియా: యజమాని లేని సమయంలో ఇదే అదునుగా భావించి కారు నడిపిన ఓ కుక్క యాక్సిడెంట్ చేసింది. అమెరికాలోని వెస్ట్ వర్జీనియాలో ఇటీవల చోటుచేసుకున్న ఈ ఘటనలో.. ఓ షాపింగ్ మాల్ ప్రాంగణంలోకి దూసుకొచ్చిన కారు కాంక్రిట్ పిల్లర్ను ఢీకొంది. దీంతో ఒక్కసారిగా అక్కడున్న వారంతా కారు వైపు పరిగెత్తి చూడగా.. అందులో మనుషులెవరూ లేకుండా, కేవలం రెండు కుక్కలు మాత్రమే ఉండటంతో షాక్ తిన్నారు.
అనంతరం అక్కడకు చేరుకున్న ఓ మహిళ ఆ కారు తనదే అని.. అందులో ఉన్నది తన పెంపుడు కుక్కలని వెల్లడించింది. తాను షాపింగ్ మాల్లోకి వెళ్లిన సమయంలో కుక్కలు ఈ పని చేశాయని తెలిపింది. రెండు కుక్కల్లో ఒకటి ఎలా చేసిందో గానీ.. కారును స్టార్ట్ చేసి గేరు వేయటంతో ఈ ప్రమాదం జరిగినట్లు తెలుస్తోంది. అదృష్టవశాత్తూ ఎవరికీ ఎటువంటి గాయాలు కాలేదు. కారు మాత్రం దెబ్బతింది. దీంతో సదరు మహిళపై ఎలాంటి కేసులు నమోదు కాలేదు.
