సోషల్‌ మీడియాలో యాక్టివ్‌గా ఉండే సెలబ్రిటీలకు ట్రోలింగ్ బాధలు తప్పటం లేదు. ముఖ్యంగా హీరోయిన్లు చేస్తున్న పోస్టింగ్‌ల విషయంలో నెటిజన్‌లు ఒక్కొక్కరూ ఒక్కోలా స్పందిస్తున్నారు. తాజాగా హీరోయిన్‌ మాళవిక మోహనన్‌ చేసిన ఓ పోస్ట్ విషయంలో నెటిజెన్‌ల స్పందన ఆమెకు కోపం తెప్పించింది.
మలయాళ ఇండస్ట్రీలో పరిచయం అయిన మాళవిక తరువాత తమిళ, హిందీ, కన్నడ చిత్రాల్లోనూ నటించారు. తాజాగా ఈ భామ తన ఇన్స్‌స్టాగ్రామ్‌లో ఓ ఫోటోను చేశారు. అయితే ఈ ఫోటోపై స్పందించిన నెటిజెన్లు.. ‘సాంప్రదాయ కుటుంబంలో పుట్టిన అమ్మాయిలు ఎలాంటి దుస్తులు ధరిస్తారో’ తెలుసా అంటూ కామెంట్ చేశారు.
ఈ కామెంట్‌లపై స్పందించిన మాళవిక మరో ఫోటోను షేర్‌ చేస్తూ ‘ఓ గౌరవ ప్రదమైన అమ్మాయి ఎలా డ్రెస్‌ చేసుకోవాలో చెప్తూ చాలా మంది కామెంట్ చేశారు. అందుకే ఈ ఫోటో నాకు నచ్చిన దుస్తులు ధరించి గౌరవప్రదంగా కూర్చున నా ఫోటో’ అంటూ మరో పోస్ట్ చేశారు. ఇటీవల ‘పేట’ సినిమాతో గుర్తిం‍పు తెచ్చుకున్న మాళవిక త్వరలో విజయ్‌ దేవరకొండ సినిమాతో టాలీవుడ్‌కు పరిచయమవుతున్నారు.
