ముంబై మైదానంలో మ్యాచ్‌ని ముగించారు అజయ్‌ దేవగన్. కోల్‌కతాలో జరగనున్న తర్వాతి మ్యాచ్‌ కోసం రెడీ అవుతున్నారు. ఇండియన్‌ ఫుట్‌బాల్‌ కోచ్‌ కమ్‌ మేనేజర్‌ సయ్యద్‌ అబ్దుల్‌ రహీమ్‌ జీవితం ఆధారంగా బాలీవుడ్‌లో ‘మైదాన్‌’ అనే చిత్రం తెరకెక్కుతోంది. ఈ చిత్రంలో కీర్తీ సురేష్‌ కథానాయికగా నటిస్తున్నారు. జీ స్టూడియోస్‌తో కలిసి బోనీ కపూర్‌ ఈ సినిమాను నిర్మిస్తున్నారు. ‘బదాయి హో’ ఫేమ్‌ అమిత్‌ శర్మ దర్శకత్వం వహిస్తున్నారు. అబ్దుల్‌ రహీమ్‌ పాత్రలో అజయ్‌ దేవగన్ నటిస్తున్నారు. ఈ చిత్రం తాజా షెడ్యూల్‌ ముంబైలో ముగిసింది. అజయ్‌ దేవగన్, కీర్తీ సురేష్‌లపై కీలక సన్నివేశాలను చిత్రీకరించారు. ఈ సినిమా తర్వాతి షెడ్యూల్‌ కోల్‌కతాలో నవంబరు 3న ప్రారంభం కానుందని బాలీవుడ్‌ సమాచారం. ఈ సినిమాను వచ్చే ఏడాది విడుదల చేయాలనుకుంటున్నారు.
