దర్శక ధీరుడు రాజమౌళి.. రామ్‌ చరణ్, ఎన్టీఆర్‌లు హీరోగా భారీ మల్టీస్టారర్‌నుతెరకెకక్కిస్తున్న సంగతి తెలిసిందే. ఆర్‌ఆర్‌ఆర్‌ పేరుతో తెరకెక్కుతున్న ఈ సినిమాతో బాలీవుడ్ బ్యూటీ అలియా భట్‌ తెలుగుకు పరిచయం అవుతోంది. ఇప్పటికే అలియా పాత్రకు సంబంధించిన విశేషాలను రాజమౌళి వెళ్లడించారు.
ఈ సినిమాలో అలియా.. రామ్‌ చరణ్‌కు జోడిగా సీత పాత్రలో నటించనుంది. ఈ పాత్రకు తగ్గట్టు నటించేందుకు ఈ భామ ప్రత్యేకంగా సిద్ధమవుతోందట. ఇప్పటికే ప్రత్యేకంగా ట్యూటర్‌ను అపాయింట్ చేసుకొని మారి తెలుగు నేర్చుకుంటుంది. ఆర్‌ఆర్‌ఆర్‌లో నటించటంపై స్పందించిన అలియా.. తెలుగు నేర్చుకోవటం కాస్త కష్టంగా ఉంది.. అయినా సినిమా కోసం కష్టపడుతున్నా అంటూ కామెంట్ చేసింది.
‘రాజమౌళిగారితో పనిచేయటం ఆనందంగా ఉంది. కేవలం బాహుబలి దర్శకుడు అనే కాదు.. మగధీర, ఈగ లాంటి ఆయన సినిమాలు అద్భుతం. తన సినిమాలు చూసేందుకు వచ్చే ఆడియన్స్‌ను సరిగ్గా అర్ధం చేసుకోగలిగిన దర్శకుడు ఆయన. ఆయన కథలు, ఎమోషన్స్‌ చాలా బలంగా ఉంటాయి. ఆర్‌ఆర్‌ఆర్‌ కూడా అలాగే ఉంటుంది’ అంటూ సినిమా విశేషాలను అభిమానులతో పంచుకుంది అలియా.
