దర్శకుడు కేవీ ఆనంద్, హీరో సూర్య కాంబినేషన్‌లో రూపొందనున్న ఓ చిత్రంలో అల్లు శిరీష్‌ ఓ కీలక పాత్రలో కనిపిస్తారని చిత్రబృందం పేర్కొంది. ఈ పాత్ర కోసం ప్రిపరేషన్‌ కూడా స్టార్ట్‌ చేశానని ఆ మధ్య శిరీష్‌ పేర్కొన్నారు. అయితే ఇప్పుడు ఈ సినిమా నుంచి అల్లు శిరీష్‌ తప్పుకున్నారు. ‘‘ సూర్య, కేవీ ఆనంద్‌గారి సినిమాకు, ‘ఏబీసిడీ’ సినిమాకు డేట్స్‌ అడ్జస్ట్‌ విషయంలో క్లాష్‌ వచ్చింది.
రెండు సినిమాల గురించి ఆలోచించి నా అంతట నేను ఈ సినిమా నుంచి తప్పుకోవాలని నిర్ణయించుకున్నాను. కేవీ ఆనంద్‌గారు కూడా ఈ విషయాన్ని అర్థం చేసుకొని నా నిర్ణయాన్ని గౌరవించారు. ఈ సినిమాలో భాగం కావాలని ఎంతో అనుకున్నాను. కానీ కుదర్లేదు. ఈ అవకాశాన్ని ఇచ్చిన కేవీ ఆనంద్‌గారికి, సూర్యగారికి, లైకా ప్రొడక్షన్స్‌కు కృతజ్ఞతలు. ఫ్యూచర్‌లో ఎప్పుడైనా ఈ టీమ్‌తో కలసి వర్క్‌ చేయాలనుకుంటున్నాను’’ అని శిరీష్‌ అసలు కారణం చెప్పారు.
