దీపావళి ఇళయ దళపతి విజయ్‌కు లక్కీగా మారింది. ఆయన నటించిన మెర్శల్, సర్కార్‌ చిత్రాలు దీపావళికి విడుదలై ఘన విజయాన్ని సాధించాయి. తాజాగా ఆయన నటించిన బిగిల్‌ చిత్రాన్ని దీపావళికి తెరపైకి తాసుకురావడానికి సన్నాహాలు చేస్తున్నారు. విజయ్‌కు జంటగా నయనతార నటిస్తున్న ఈ చిత్రాన్ని అట్లీ తెరకెక్కిస్తున్నాడు. ఏజీఎస్‌ సంస్థ నిర్మిస్తున్న ఈ చిత్రానికి ఏఆర్‌.రెహ్మాన్‌ సంగీతాన్ని అందిస్తున్నారు. ఈ సినిమాలో విజయ్ గ్యాంగ్‌స్టర్, ఫుట్‌బాల్‌ క్రీడా శిక్షకుడిగా ద్విపాత్రా భినయం చేస్తున్నారు.
అసలు విషయం ఏమిటంటే ఈ దీపావళికి విజయ్ చిత్రంతో విజయ్‌సేతుపతి నటించిన సినిమా పోటీపడనుంది. బహుభాషా నటుడిగా పేరు తెచ్చుకున్న విజయ్ సేతుపతి తాజాగా నటిస్తున్న చిత్రం సంఘతమిళన్‌. విజయాప్రొడక్షన్స్‌ పతాకంపై బి.భారతీరెడ్డి నిర్మిస్తున్న ఈ చిత్రంలో విజయ్‌సేతుపతికి జంటగా రాశీఖన్నా, నివేదాపేతురాజ్‌ నటిస్తున్నారు. స్కెచ్‌ చిత్రం ఫేమ్‌ విజయ్‌చందర్‌ దర్శకత్వం వహిస్తున్న ఈ చిత్రంలో విజయ్‌సేతుపతి తొలిసారిగా ద్విపాత్రాభినయం చేస్తుండటం విశేషం.
కాగా సంఘతమిళన్‌ చిత్రాన్ని దీపావళికి విడుదల చేయనున్నట్లు చిత్ర యూనిట్‌ అధికారికంగా ప్రకటించింది. దీంతో విజయ్, విజయ్ సేతుపతిలు దీపావళి బరిలో ఢీకొనడం ఖాయం అయింది. వరుస విజయాల జోరులో ఉన్న ఈ ఇద్దరు హీరోల చిత్రాలు ఒకేసారి తెరపైకి రావడం ఇదే మొదటిసారి. విజయ్ బిగిల్‌పై అంచనాలు భారీ స్థాయిలో ఉన్నాయి. అలాంటిది ఆయన చిత్రానికి పోటీగా వస్తున్నాడంటే విజయ్‌సేతుపతి సంఘతమిళన్‌ చిత్రాన్ని తక్కువగా చూడలేం. ఇప్పటికే ఈ చిత్రంపై భారీ అంచనాలు ఏర్పడ్డాయి. దీంతో ఈ దీపావళికి విజయ్, విజయ్‌సేతుపతి అభిమానుల హడావుడీ చూడబోతున్నామన్నమాట.
