సినిమా తారలకు వయసు పైబడుతుంటే వారి అభిమానులకు ఆందోళనగా ఉంటుంది. వాళ్లు నిత్యయవ్వనంగా ఉండాలని అభిమానులు కోరుకుంటారు. వయసు కనబడనివ్వకుండా ఆర్టిస్టులు కూడా యంగ్‌గా కనిపించడానికి జాగ్రత్తలు తీసుకుంటారు. కానీ, శారీరక మార్పులు స్పష్టంగా కనిపించేస్తాయి. ప్రస్తుతం ఈ విషయంలోనే హాలీవుడ్ తార కామరూన్ డయాజ్ ఆందోళన చెందుతున్నారు. ఆమె వయసు 41. కానీ, అభిమానులు మాత్రం 25 ఏళ్ల పడుచు పిల్లలా కనిపించాలని కోరుకుంటున్నారట. ఎప్పటికీ తనని అలానే చూడాలని ఆశపడుతున్నారట. ఈ విషయం గురించి ప్రస్తావించి, తన అభిమానులకు క్షమాపణలు చెప్పారు కామరూన్. నిజానికి తనకూ అలాగే కనిపించాలని ఉందని, కానీ వయసనేది ప్రకృతితో ముడిపడింది కాబట్టి దాన్ని జయించలేనని, అభిమానులను నిరుత్సాహపరుస్తున్నందుకు బాధగా ఉందని పేర్కొన్నారు కామరూన్.
