కేరాఫ్‌ కంచరపాలెం సినిమా ట్రైలర్‌ బుధవారం సాయంత్రం విడుదలైంది. చిత్రబృందం ఈ సినిమా ట్రైలర్‌ను సోషల్‌ మీడియా వేదికగా విడుదల చేసింది. వెంకటేష్‌ మహా దర్శకత్వం వహించిన ఈ సినిమాకు రానా దగ్గుబాటి నిర్మాతగా వ్యవహరించారు. సినిమా ప్రీవ్యూకి మంచి స్పందన లభించింది. సినీ ప్రముఖులు సుకుమార్‌, క్రిష్‌, అవసరాల శ్రీనివాస్‌, తరుణ్‌ భాస్కర్‌, ఎమ్‌ ఎమ్‌ కీరవాణి సినిమాను ప్రశంసలతో ముంచెత్తారు.
ఈ సినిమా నిర్మాత రానా దగ్గుబాటి స్పందిస్తూ... ‘‘ఈ సినిమాను మీ ముందుకు తీసుకువస్తున్నందుకు చాలా గర్వంగా ఉంది. ఈ సినిమా ఘన విజయం సాధించి గొప్పసినిమాగా నిలుస్తుందని ఆశిస్తున్నా’’నని అన్నారు. ఇక ట్రైలర్‌ విషయానికి వస్తే.. గ్రామీణ నేపథ్యంతో పల్లె పరిస్థితులను, మనస్తత్వాలకు అద్దం పట్టేలా ఉంది. పల్లెటూరి హాస్యం అందరిని ఆకట్టుకుంటుంది. ఈ సినిమా సెప్టెంబర్‌ 7వ తేదీన ప్రేక్షకుల ముందుకు కాబోతోంది.
