తెలుగు సినిమా కీర్తి పతాకాన్ని అంతర్జాతీయ యవనికపై రెపరెపలాడించిన సినిమా ‘శంకరాభరణం’ (1979). కె.విశ్వనాథ్ దర్శకత్వంలో పూర్ణోదయా మూవీ క్రియేషన్స్ పతాకంపై ఏడిద నాగేశ్వరరావు నిర్మించిన ఈ చిత్రం విడుదలై 34 ఏళ్లవుతున్నా ఇంకా క్రేజ్ తగ్గలేదు. అందుకు నిదర్శనం ఏంటంటే - ఈ చిత్రాన్ని అత్యాధునిక సాంకేతిక పరిజ్ఞానంతో డిజిటలైజ్ చేసి, 5.1 సౌండ్ సిస్టమ్ హంగులతో, సినిమా స్కోప్‌లోకి మార్చి తమిళంలో విడుదల చేయబోతున్నారు. తమిళ నాట ప్రస్తుతం పాత సినిమాలను డిజిటలైజ్ చేసి మళ్లీ విడుదల చేసే ట్రెండ్ మొదలైంది.
ఈ నేపథ్యంలో తమిళ నిర్మాత ఒకరు ‘శంకరాభరణం’ అనువాద హక్కులు తీసుకుని డిజిటలైజ్ చేసి, ఈ నెలాఖరున విడుదల చేయబోతున్నారు. గతంలో ‘శంకరాభరణం’ తెలుగు వెర్షనే తమిళనాట సిల్వర్ జూబ్లీ ఆడింది. మరి ఈ తమిళ వెర్షన్ ఏ స్థాయిలో ఆకట్టుకుంటుందో చూడాలి. ఈ డిజిటల్ వెర్షన్‌ని తెలుగులో కూడా విడుదల చేసే యోచనలో ఉన్నారు ఏడిద నాగేశ్వరరావు. ఈ ట్రెండ్ ఫలితంగా... శిథిలావస్థకు చేరుకున్న సినిమాల ప్రింట్లు కొత్త హంగులు అద్దుకుంటే సినీ ప్రియులకు అంతకన్నా ఆనందం ఏముంటుంది!
