చెన్నై: ప్రేమికుడి టార్చర్‌తో రెండవ రోజు నుంచే షూటింగ్‌ స్పాట్‌ నుంచి హీరోయిన్‌ పారిపోయిందని బాబీలోన్‌ చిత్ర దర్శకుడు ఆరురాజా తెలిపారు. కళా దర్శకుడు తోట తరణి వద్ద సహాయకుడిగా పనిచేసి ఈ చిత్రం ద్వారా దర్శకుడిగా, కథానాయకుడిగా ఆరురాజా పరిచయం అవుతున్నారు. అంతేకాదు రజనీకాంత్‌ నటించిన చంద్రముఖి చిత్రంలో చంద్రముఖి వర్ణచిత్రాలను గీసింది కూడా ఆయన.
ఆరురాజా తన బ్లూమింగ్‌ ఆర్ట్‌ స్డూడియో పతాకంపై స్వీయ దర్శకత్వంలో నిర్మిస్తూ కథానాయకుడి నటిస్తున్న చిత్రం బాబీలోన్‌. చిత్ర కథ గురించి తెలుపుతూ తండ్రిలేని కుటుంబాన్ని హీరో చాలా ప్రేమగా ఎలాంటి లోటు లేకుండా కాపాడుకుంటూ వస్తాడన్నారు. అలాంటిది తన చెల్లెలికి సంబంధించిన ఒక వీడియోతో ఒక ముఠా బెదిరించడంతో పాటు ఒక దశలో ఆమెను కిడ్నాప్‌ చేయడానికి ప్రయత్నిస్తారన్నారు. అలా వారి బారిన పడ్డ తన చెల్లెలి విషయాన్ని తన ప్రియురాలి ద్వారా తెలుసుకున్న హీరో తన చెల్లెలిని ఎలా కాపాడుకున్నాడన్నదే బాబీలోన్‌ చిత్ర ప్రధాన ఇతివృత్తం అని తెలిపారు.
చిత్ర షూటింగ్‌ను వత్తలకుండు, తాండిక్కుడి, కోడైకెనాల్‌ ప్రాంతాల్లో నిర్వహించి పూర్తి చేసినట్లు తెలిపారు. ప్రస్తుతం నిర్మాణాంతర కార్యక్రమాలను జరుపుకుంటున్న ఈ చిత్రానికి సంగీతాన్ని శ్యామ్‌ మోహన్, అరుళ్‌సెల్వన్‌ ఛాయాగ్రహణం అందిస్తున్నట్లు చెప్పారు. కాగా ఈ చిత్రానికి ముందు వేరే నటిని హీరోయిన్‌గా ఎంపిక చేసినట్లు తెలిపారు. అయితే ఆమె షూటింగ్‌ ప్రారంభమైన రెండో రోజునే తన తల్లి ఆరోగ్యం బాగాలేదని చెప్పి షూటింగ్‌ నుంచి వెళ్లి పోయిందన్నారు, ప్రియుడి ఈగో, టార్చర్‌ భరించలేకే పారిపోయినట్లు ఆ తరువాత తెలిసిందన్నారు. ఆ నటి కంటే నటి శ్వేతా జోయల్‌నే చాలా బాగా నటించినట్లు దర్శక, నిర్మాత, నటుడు ఆరురాజా తెలిపారు.
