‘జంబలకిడి పంబ’లా...

3 Jan, 2014 02:28 IST|Sakshi
‘జంబలకిడి పంబ’లా...
 ఇరవై ఏళ్ల క్రితం ఈవీవీ దర్శకత్వంలో వచ్చిన ‘జంబలకిడి పంబ’ సినిమా ప్రేక్షకులను ఎంతలా నవ్వించిందో ప్రత్యేకించి చెప్పాల్సిన పనిలేదు. ఆ టైటిల్‌ని గుర్తుచేసే విధంగా ఇప్పుడు ‘పంబలకిడి జంబ’ పేరుతో ఓ చిత్రం రూపొందుతోంది. అశోక్, దివ్య, అనూష ప్రధాన పాత్రధారులు. శివరాం గొర్రెపాటి దర్శకుడు. యు.ఎన్.రాజ్ నిర్మాత. జయవర్ధన్ స్వరాలందించిన ఈ చిత్రం పాటలను హైదరాబాద్‌లో విడుదల చేశారు. ఇండియన్ ఐడల్ శ్రీరామచంద్ర ఆడియోసీడీని ఆవిష్కరించి, తొలి ప్రతిని సీనియర్ హీరో నరేష్‌కి అందించారు.
 
 కొత్త దర్శకుల సినిమాలు ఇటీవల ఘన విజయాలను అందుకున్నాయని, వాటి వరుసలోనే ఈ సినిమా కూడా విజయం సాధించాలని, తన ‘జంబలకిడి పంబ’లా ప్రేక్షకులకు వినోదాన్ని పంచాలని నరేష్ ఆకాంక్షించారు. ప్రధాన పాత్రధారులు కొత్తవారైనా చక్కగా నటించారని దర్శకుడు చెప్పారు. దర్శకుడు ‘నల్లపూసలు’ బాబ్జీ ఇందులో ప్రత్యేక పాత్ర పోషించడం విశేషమని, పోస్ట్ ప్రొడక్షన్ ముగించి ఈ నెలలోనే సినిమాను విడుదల చేస్తామని నిర్మాత చెప్పారు. కె.వి.వి.సత్యనారాయణ, మోహన్‌గౌడ్, తోట కృష్ణ, కె.ఎస్.నాగేశ్వరరావు, ఎ.ఎస్.రావు తదితరులు ఈ కార్యక్రమంలో పాల్గొన్నారు.