కంగనా ‘ధాకడ్‌’ ఫస్ట్‌లుక్‌ టీజర్‌ విడుదల

9 Aug, 2019 18:30 IST|Sakshi

ముంబై : బాలీవుడ్‌ ఫైర్‌ బ్రాండ్‌గా పిలువబడే కంగనా రనౌత్‌ గురించి ప్రత్యేకంగా చెప్పనవసరం లేదు. ఛాలెంజింగ్‌ పాత్రలు స్వీకరించడంలో ముందుటారు ‘క్వీన్‌’ కంగనా. ఈ మధ్యకాలంలో వచ్చిన మణికర్ణిక, ‘జడ్జ్‌మెంటల్‌ హై క్యా’ సినిమాలతో అలరించిన కంగనా తర్వాత నటించబోతున్న చిత్రం ధాకడ్‌. మహిళా ప్రాధాన్యంగా సాగే ఈ సినిమా భారీ యాక్షన్‌ సినిమాగా తెరకెక్కనుంది. ఇందులో లేడి ఫైటర్‌గా కంగనా కనిపించనున్నారు. ఈ సినిమాకు సంబంధించిన ఫస్ట్‌ లుక్‌ టీజర్‌ను చిత్ర యూనిట్‌ శుక్రవారం  విడుదల చేసింది. 45 సెకన్ల నిడివి ఉన్న ఈ టీజర్‌లో కంగనా చేతిలో తుపాకీ పట్టుకొని ధీరత్వంతో పోరాడుతూ కనిపిస్తున్నారు.

టీజర్‌ విడుదల సందర్భంగా కంగనా మాట్లాడుతూ.. ‘టీజర్‌లో ఉపయోగించిన తుపాకీలు అన్ని నిజమైనవి. చాలా బరువు కలిగి ఉన్నాయి. ఒక్కో తుపాకీని ఎత్తడానికి ఎంతో కష్టపడ్డాను. ఈ సినిమా నా కెరీర్‌లో ఉత్తమ చిత్రంగా నిలుస్తుంద’న్నారు. ‘ధాకడ్‌’ భారతీయ సినీ రంగంలో కీలక సినిమాగా మారనుందని అభిప్రాయపడ్డ కంగనా.. కనీసం సినిమా షూటింగ్‌లో అయినా దర్శకుడు డమ్మీ తుపాకీలను ఉపయోగిస్తాడని ఆశిస్తున్నా అని  చమత్కరించారు. దర్శకుడు రజ్నీష్‌ ఘాయ్‌ మాట్లాడుతూ.. టీజర్‌ చిత్రీకరణలో పోరాట సన్నివేశాల కోసం కంగనా ప్రత్యేక శిక్షణ  తీసుకున్నట్లు వెల్లడించారు.  వచ్చే ఏడాది ప్రారంభంలో సెట్స్‌ మీదకు వెళ్లనున్న ఈ సినిమా 2020 దీపావళి కానుకగా విడుదల కానుంది.

మరిన్ని వార్తలు