ప్రముఖ గాయని లతామంగేష్కర్‌కు టి.సుబ్బిరామిరెడ్డి ఫౌండేషన్ ఆధ్వర్యంలో ‘నేషనల్ యశ్ చోప్రా మెమోరియల్ అవార్డు’ను అందించనున్నట్లు ఫౌండేషన్ చైర్మన్ టి. సుబ్బిరామిరెడ్డి తెలిపారు. ఆదివారం హైదరాబాద్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ-‘‘వందేళ్ల భారత సినీ చరిత్రలో 60 సంవత్సరాలకు పైగా సేవలందించిన ఘనత యశ్ చోప్రాది.
అందుకే ఆయన జ్ఞాపకార్థం ఈ అవార్డ్డును ఏర్పాటు చేశాం. ఈ అవార్డు కమిటీకి జ్యూరీ సభ్యులుగా హేమామాలిని, అనిల్‌కపూర్, సిమి గరెవాల్ వ్యవహరిస్తున్నారు. అందరం కలిసి ఈ అవార్డును లతా మంగేష్కర్‌కు అందించాలని నిర్ణయించుకున్నాం. ఈ అవార్డు ద్వారా జ్ఞాపిక, 10లక్షల రూపాయలు నగదు బహుమతిగా అందించనున్నాం. అక్టోబర్ 19న ముంబైలో జరపనున్న ఈ అవార్డు ప్రదాన కార్యక్రమంలో అతిథులుగా పలువురు రాజకీయ, సినీరంగ ప్రముఖులు పాల్గొంటారు.
అలాగే ఆగస్ట్ 11న సుబ్బిరామిరెడ్డి ఫౌండేషన్ ఆధ్వర్యంలో రాష్ట్రంలో క్రీడలను అభివృద్ధి చేసేందుకుగానూ విశాఖపట్టణంలో స్టార్ క్రికెట్ మ్యాచ్ నిర్వహించనున్నాం. ఈ క్రికెట్ మ్యాచ్‌లో ప్రముఖ సినీతారలు ఆడనున్నారు’’ అని తెలిపారు. ఈ కార్యక్రమంలో రమణమూర్తి, ఎన్‌కే రాము, వంశీ రామరాజు తదితరులు పాల్గొన్నారు.
