‘‘జనగణమన’ సినిమా నా డ్రీమ్‌ ప్రాజెక్ట్‌’’ అంటున్నారు దర్శకుడు పూరి జగన్నాథ్. ‘పోకిరి’ (2006), ‘బిజినెస్‌మేన్‌’ (2012) చిత్రాల తర్వాత దర్శకుడు పూరి జగన్నాథ్, హీరో మహేశ్‌బాబుల కాంబినేషన్‌లో ‘జనగణమన’ అనే చిత్రం రూపొందనుందని అప్పట్లో వార్తలు వచ్చిన విషయం గుర్తుండే ఉంటుంది. ఈ చిత్రాన్ని స్వయంగా పూరీయే ప్రకటించారు. ఆ తర్వాత కొన్ని కారణాల వల్ల ఈ ప్రాజెక్ట్‌ ఆగిపోయిందనే టాక్‌ వినిపించింది. ‘‘జనగణమన’ చిత్రం ఆగిపోలేదు. ఇది నా డ్రీమ్‌ ప్రాజెక్ట్‌’’ అని తాజాగా పూరి జగన్నాథ్ పేర్కొనడంతో ఈ చిత్రం గురించి మళ్లీ ఇండస్ట్రీలో మాట్లాడుకుంటున్నారు. లాక్‌డౌన్‌లో ఈ సినిమా స్క్రిప్ట్‌పై పూరి దృష్టి సారించారని సమాచారం. అలాగే ‘జనగణమన’ చిత్రాన్ని పాన్‌ ఇండియా స్థాయిలో తెరకెక్కించాలని ఆయన ప్లాన్‌ చేస్తున్నారని తెలిసింది. ఓ సైనికుడి బ్యాక్‌డ్రాప్‌లో ‘జనగణమన’ కథనం ఉంటుందట. మరి... ముందు ప్రకటించినట్లు ఈ చిత్రంలో మహేశ్‌బాబు హీరోగా నటిస్తారా? లేక వేరే హీరో ఎవరైనా నటిస్తారా? వెయిట్‌ అండ్‌ సీ. ఈ సంగతి ఇలా ఉంచితే... ప్రస్తుతం విజయ్‌ దేవర కొండ హీరోగా నటిస్తోన్న ‘ఫైటర్‌’ (వర్కింగ్‌ టైటిల్‌) చిత్రాన్ని డైరెక్ట్‌ చేస్తున్నారు పూరి జగన్నాథ్.
