‘మనమంతా’, ‘జనతా గ్యారేజ్‌’... ఇలా స్ట్రెయిట్‌ చిత్రాలతో పాటు ‘మన్యంపులి’ వంటి డబ్బింగ్‌ చిత్రాల ద్వారా కూడా మోహన్‌లాల్‌ తెలుగులో వరుస విజయాలు సాధిస్తున్నారు. ఆయన నటించిన ‘రన్‌ బేబీ రన్‌’ని త్వరలో ‘బ్లాక్‌ మనీ’ పేరుతో మాజిన్‌ మూవీ మేకర్స్‌ పతాకంపై నిజాముద్దీన్‌ తెలుగులో విడుదల చేయనున్నారు. మోహన్‌లాల్‌–అమలాపాల్‌ జంటగా నటించిన ఈ చిత్రానికి జోషి దర్శకుడు. ‘అన్నీ కొత్త నోట్లే’ అన్నది ఉపశీర్షిక. ఈ చిత్రం సెన్సార్‌ కార్యక్రమాలు పూర్తయ్యాయి. నిజాముద్దీన్‌ మాట్లాడుతూ – ‘‘నోట్ల రద్ద తర్వాత దేశమంతటా బ్లాక్‌మనీ గురించే చర్చ జరిగింది. నల్లకుబేరులు కొత్త కరెన్సీతో అడ్డంగా దొరికిపోయారు. ఈ కాన్సెప్ట్‌తో రూపొందిన ‘రన్‌ బేబీ రన్‌’ మలయాళంలో ఘనవిజయం సాధించింది. ఈ నెలలోనే తెలుగులో విడుదల చేయబోతున్నాం. ఇక్కడ కూడా మంచి విజయం సాధిస్తుందనే నమ్మకం ఉంది. మోహన్‌లాల్‌ నటన, వెన్నెల కంటి సంభాషణలు హైలైట్‌గా నిలుస్తాయి’’ అన్నారు.
