చాలా రోజులుగా స్ట్రయిట్ తెలుగు సినిమా చేస్తానంటూ ఊరిస్తూ వస్తున్న సూర్య.. ఎట్టకేలకు దానికి ముహూర్తం నిర్ధారించాడు. మాటల మాంత్రికుడు త్రివిక్రమ్ శ్రీనివాస్ దర్శకత్వంలో తెలుగు, తమిళ భాషల్లో ఒకేసారి తెరకెక్కనున్న సినిమాతో తెలుగు ప్రేక్షకులను పలకరించనున్నాడు. ఈ సినిమాను 2016 జూలైలో సెట్స్ మీదకు తీసుకెళ్లాలని ప్లాన్ చేస్తున్నారు చిత్రయూనిట్.
ప్రస్తుతం త్రివిక్రమ్ నితిన్ హీరోగా అ..ఆ.. సినిమాను తెరకెక్కిస్తుండగా, ఇటీవలే 24 షూటింగ్ పూర్తిచేసిన సూర్య, సింగం 3 షూటింగ్ మొదలు పెట్టనున్నాడు. ఈ ప్రాజెక్టులు పూర్తయిన తర్వాత సూర్య, త్రివిక్రమ్ల కాంబినేషన్లో తెరకెక్కనున్న సినిమా సెట్స్ మీదకు వెళ్లనుంది. ఈ సినిమాను త్రివిక్రమ్తో వరుస సినిమాలు చేస్తున్న హారికా హాసిని క్రియేషన్స్ బ్యానర్ పై ఎస్.రాధాకృష్ణ నిర్మించనున్నారు. త్వరలోనే సినిమాకు సంబందించిన పూర్తి వివరాలను వెల్లడించనున్నారు.
