లాంగ్ గ్యాప్ తరువాత వరుస సినిమాలకు కమిట్ అవుతున్న మాస్ మహారాజ్ రవితేజ ప్రస్తుతం రెండు సినిమాలతో బిజీగా ఉన్నాడు. పటాస్ ఫేం అనీల్ రావిపూడి దర్శకత్వంలో తెరకెక్కుతున్న రాజా ది గ్రేట్ షూటింగ్ ఇప్పటికే పూర్తి కావచ్చింది. ఈ సినిమాతో పాటు టచ్ చేసి చూడు సినిమా షూటింగ్లో బిజీగా ఉన్నాడు. ఈ రెండు సినిమాలు పూర్తయిన తరువాత ఓ తమిళ సినిమా రీమేక్కు రెడీ అవుతున్నాడు రవితేజ.
కోలీవుడ్లో ఘనవిజయం సాధించిన భోగన్ సినిమాను తెలుగులో రీమేక్ చేయనున్నాడు. ఒరిజినల్ వర్షన్కు దర్శకత్వం వహించిన లక్ష్మణ్ తెలుగు వర్షన్ దర్శకత్వ బాధ్యతలు కూడా తీసుకున్నాడు. ఇద్దరు హీరోయిన్లకు అవకాశం ఉన్న ఈ సినిమాలో లీడ్ హీరోయిన్గా కేథరిన్ థెరిస్సా నటిస్తుండగా మరో కీలక పాత్రలో అప్పట్లో ఒకడుండేవాడు ఫేం తాన్య హోప్ నటించనుంది. అక్టోబర్ లో ఈ సినిమా రెగ్యులర్ షూటింగ్ ప్రారంభించేందుకు ప్లాన్ చేస్తున్నారు చిత్రయూనిట్.
