అకౌంట్స్‌ మేటర్‌లో ఏదైనా తేడా వస్తే ఎవరైనా ఊరుకుంటారా? లెక్కలు సరి చేస్తారు. అవసరమైతే తేడా చేసినవాళ్ల తాట తీస్తారు. ప్రజెంట్‌ హీరో వరుణ్ తేజ్‌ అదే పనిలో ఉన్నారు. తన లవ్‌ అకౌంట్‌ను ఇబ్బందిపెట్టిన కొందరి పోరగాళ్లను కుమ్మేస్తున్నాడు. మరి... ఈ లవ్‌ అకౌంట్‌ ఫుల్‌ డీటెల్స్‌ తెలియాలంటే మా సినిమా చూడాల్సిందేనని అంటున్నారు ‘తొలిప్రేమ’ చిత్రబృందం.
వెంకీ అట్లూరి దర్శకత్వంలో వరుణ్ తేజ్‌ హీరోగా బీవీఎస్‌ఎన్‌ ప్రసాద్‌ నిర్మిస్తున్న సినిమా ‘తొలిప్రేమ’. రాశీఖన్నా కథానాయిక. ప్రస్తుతం ఈ సినిమాలోని ఫైట్‌ సీన్స్‌ను హైదరాబాద్‌లోని ఓ కాలేజ్‌ క్యాంపస్‌లో తెరకెక్కిస్తున్నారు. ఈ చిత్రాన్ని ఫిబ్రవరి 9న రిలీజ్‌ చేయాలనుకుంటున్నారు. ఈ సంగతి అలా ఉంచితే... అనిల్‌ రావిపూడి దర్శకత్వంలో తెరకెక్కబోయే మల్టీస్టారర్‌ మూవీలో వెంకటేశ్‌తో కలిసి వరుణ్ తేజ్‌ స్క్రీన్‌ షేర్‌ చేసుకోబోతున్నారని ఫిల్మ్‌నగర్‌ తాజా సమాచారం. గతంలో ఈ సినిమాకు ‘ఫన్‌ అండ్‌ ఫ్రస్ట్రేషన్‌’ అనే టైటిల్‌ తెరపైకి వచ్చిన సంగతి తెలిసిందే.
