‘‘నా భర్త సిద్దార్థ్ రాయ్ కపూర్‌ది ఉన్నతమైన వ్యక్తిత్వం. భర్తలందరూ తన భార్యల్ని సొంత ఆస్తులుగా భావిస్తుంటారు. కానీ... నా భర్త నన్ను అలా భావించరు. ఒక వ్యక్తిగా గౌరవిస్తారు. నా అభిమతానికి అడ్డురారు’’అన్నారు విద్యాబాలన్. ఆమె కథానాయికగా రూపొందిన ‘బాబీ జాసూస్’ చిత్రం త్వరలో విడుదల కానుంది. హైదరాబాద్ నేపథ్యంతో కూడిన కథాంశంతో తెరకెక్కిన ఈ సినిమా ప్రమోషన్ నిమిత్తం ఏర్పాటు చేసిన ఓ కార్యక్రమంలో విద్యా తన వ్యక్తిగత జీవితం గురించి ఆసక్తికరమైన విషయాలు చెప్పారు.
‘‘పెళ్లి తర్వాత సినీ తారల జీవితాల్లో మార్పులు చోటుచేసుకోవడం సహజం. కానీ... పెళ్లి తర్వాత కూడా నా జీవితంలో ఎలాంటి మార్పు లేదు. 2007 నుంచి ఏడాదికి ఒకే చిత్రంలో నటిస్తున్నాను. ఇప్పుడూ అదే జరుగుతోంది. దీనికి కారణం నా భర్త సిద్దూనే’’ అని చెప్పారు విద్య. ‘‘పెళ్లికి ముందు నుంచీ సిద్దూతో నాకు రిలేషన్ ఉంది. పెళ్లి తర్వాత కూడా అదే కొనసాగుతోంది. మా ఇద్దరి రంగాలూ వేరైనా... మా వృత్తులను పరస్పర అవగాహనతో గౌరవించుకుంటాం. ప్రేమ విషయంలో మా అమ్మానాన్నలనే మరిపించాడు తను’’ అని విద్యాబాలన్ ఉద్వేగానికి లోనయ్యారు.
