న్యూఢిల్లీ: నడవలేని స్థితిలో ఉన్న 70 ఏళ్ల వృద్ధురాలి పట్ల ఎయిర్ ఇండియా సిబ్బంది అమానవీయంగా ప్రవర్తించారు. వీల్ చైర్ లో వచ్చిన ఆమెను విమానం ఎక్కనీయకుండా అడ్డుకున్నారు. శుక్రవారం ఈ ఘటన చోటుచేసుకుంది. ముంబై నుంచి ఢిల్లీ మీదుగా న్యూయార్క్ వెళ్లే విమానం ఎక్కేందుకు వచ్చిన వృద్ధురాలిని 'ఓవర్ బుకింగ్' కారణంగా ఎయిర్ ఇండియా సిబ్బంది అడ్డుకున్నారు.
ఆమె కుమార్తె ట్విటర్ ద్వారా ఈ విషయాన్ని వెలుగులోకి తెచ్చారు. తన తల్లికి సాయం చేయాలని ఎయిర్ ఇండియాకు ట్విటర్ ద్వారా విజ్ఞప్తి చేశారు. దీంతో స్పందించిన అధికారులు వృద్ధురాలిని ఢిల్లీ-లండన్ విమానంలో పంపించారు. అక్కడి నుంచి కనెక్టింగ్ విమానం ద్వారా శనివారం న్యూయార్క్ కు చేర్చారు.
ముందు రోజు విమానం రద్దు కావడంతో తన తల్లికి ముంబై-న్యూయార్క్ విమానంలో ప్రవేశం నిరాకరించారని వృద్ధురాలి కుమార్తె తెలిపారు. తన తల్లి పట్ల అమానవీయంగా వ్యవహరించారని, వీల్ చైర్ కూడా ఎప్పటికో ఇచ్చారని ఆవేదన వ్యక్తం చేశారు. పరిస్థితి చేయి దాటిపోయిన తర్వాతే ఎయిర్ ఇండియా సిబ్బంది స్పందించారని చెప్పారు.
