వెల్లూరు: తమిళనాడు మాజీ ముఖ్యమంత్రి కరుణానిధి తనయుడు ఎంకే స్టాలిన్కు ఓ యువతి నుంచి తీవ్ర నిరసన వ్యక్తమైంది. కంటినిండా నీరుతో గద్గద స్వరంతో చేతిలో బీరు బాటిల్ పట్టుకొని ఊపుతూ ఆమె తన ఆవేదనను వెల్లిబుచ్చింది. వెల్లూరులో ఆయన బుధవారం 'నమక్కు నామే' అనే ఓ ప్రచార కార్యక్రమానికి వెళ్లిన సందర్భంగా ఆ యువతి లిక్కర్ బాటిల్ తో ఆయన ముందుకు వచ్చింది.
మద్యం మహామ్మారి తన తండ్రిని పొట్టన పెట్టుకుందని, ఏ పార్టీ అధికారంలోకి వచ్చినా మద్యాన్ని మాన్పించలేకపోతున్నారని, ఫలితంగా తమలాంటి కుటుంబాలు రోడ్డున పడుతున్నాయని, ఈ సారి డీఎంకే ప్రభుత్వమైనా మద్యాన్ని పూర్తిగా నిషేధిస్తామని హామీ ఇవ్వాలని చెప్పింది. ఇందుకు స్పందించిన స్టాలిన్.. తాము అధికారంలోకి వస్తే తప్పకుండా మద్యాన్ని పూర్తిగా నిషేధిస్తామని, తమ అజెండాలో ఆ అంశం కూడా ఉందని చెప్పారు.
