జయా బచ్చన్‌పై ఎంపీ అగర్వాల్‌ వ్యాఖ్య
న్యూఢిల్లీ: సమాజ్‌వాదీ పార్టీ (ఎస్‌పీ)కి చెందిన రాజ్యసభ సభ్యుడు నరేశ్‌ అగర్వాల్‌ బీజేపీ తీర్ధం పుచ్చుకున్నారు. ఈ సందర్భంగా సినీ నటి, రాజకీయ నేత జయా బచ్చన్‌పై వివాదాస్పద వ్యాఖ్యలు చేశారు. బీజేపీలో చేరిన సందర్భంగా ఢిల్లీలో విలేకరులతో మాట్లాడుతూ..‘సినిమాల్లో నటించే వారితో, డ్యాన్స్‌ చేసే వారితో పోలుస్తూ ఆ స్థాయికి నన్ను సమాజ్‌వాదీ పార్టీ దిగజార్చింది..నాకు పార్టీ టికెట్‌ నిరాకరించటం సబబు కాదు’ అని జయాబచ్చన్‌పై, సమాజ్‌ వాదీ పార్టీపై మండిపడ్డారు. జయ కారణంగా తనకు రాజ్యసభ అవకాశం చేజారిందని ఆయన పరోక్షంగా పేర్కొన్నారు. ఈ వ్యాఖ్యలతో తమకు సంబంధం లేదని బీజేపీ స్పష్టంచేసింది.
