జేడీఎస్‌తో చేతులు కలపాలని రాహుల్‌ ఇంట జరిగిన లంచ్‌ భేటీలో నిర్ణయం
న్యూఢిల్లీ: జేడీఎస్‌ అధినేత హెచ్‌డీ దేవెగౌడకు కాంగ్రెస్‌ స్నేహహస్తం చాచడం ఆసక్తికర పరిణామం. దక్షిణాదిలో బీజేపీ పాగా వేయకుండా అడ్డుకునేందుకే కాంగ్రెస్‌ ఈ ఎత్తుగడ వేసినట్లు కనిపిస్తోంది. అయితే ఈ వ్యూహానికి వేదికైంది మాత్రం పార్టీ అధ్యక్షుడు రాహుల్‌ గాంధీ నివాసమే. ఫలితాల సరళిలో బీజేపీ అతిపెద్ద పార్టీగా అవతరిస్తుందని తెలిసిన వెంటనే రాహుల్‌ ఇంట్లో పార్టీ అధినాయకత్వం లంచ్‌ సమావేశం నిర్వహించింది.
రాహుల్‌ సోదరి ప్రియాంక కూడా దీనికి హాజరయ్యారు. ఏ మాత్రం ఆలస్యం చేయకుండా ‘కింగ్‌ మేకర్‌’ దేవెగౌడకు చేరువకావాలని నిర్ణయించారు. తమతో చేతులు కలపాలని, సంకీర్ణ ప్రభుత్వానికి కుమారస్వామి నేతృత్వం వహించినా తమకేం అభ్యంతరం లేదని సీనియర్‌ నాయకుడు గులాం నబీ ఆజాద్‌తో ఫోన్‌ చేయించారు. ఈ ఆఫర్‌కు కుమారస్వామి అంగీకరించడం, ఆ వెంటనే గవర్నర్‌ను కలవడం చకచకా జరిగిపోయాయి.
