ముంబై : టీమిండియా కెప్టెన్ విరాట్ కోహ్లి మైదానంలో కనబర్చిన క్రీడాస్పూర్తికి యావత్ క్రికెట్ ప్రపంచం సలాం కొడుతుంది. కోహ్లి అంటే విషం కక్కే ఆస్ట్రేలియా మీడియా సైతం ప్రశంసలు కురిపిస్తోంది. ఆదివారం ఆస్ట్రేలియాతో జరిగిన మ్యాచ్లో భారత అభిమానులు ఆసీస్ మాజీ కెప్టెన్ స్టీవ్స్మిత్ను గేలిచేస్తుండగా కోహ్లి మందలించి, అడ్డుకున్న విషయం తెలిసిందే. టాంపరింగ్ వివాదాన్ని ప్రస్తావిస్తూ చీటర్ చీటర్ అంటూ అరుస్తున్న అభిమానులను కోహ్లి అడ్డుకున్నాడు. చప్పట్లు కొట్టి ప్రోత్సహించాలని సైగ చేశాడు. (చదవండి: మావాళ్ల తరఫున సారీ స్మిత్ : కోహ్లి)
అంతేకాకుండా అభిమానుల తరఫున స్మిత్కు క్షమాపణలు చెప్పాడు. మైదానంలో ఎప్పుడూ దూకుడుగా ఉండే కోహ్లి.. ఇలా ప్రవర్తించడం అదనపు గౌరవాన్ని తెచ్చిపెట్టింది. కోహ్లి చేసిన ఈ పనితో అతని సతీమణి, బాలీవుడ్ నటి అనుష్క శర్మ అయితే ఉబ్బితబ్బిబ్బవుతోంది. దీనికి సంబంధించిన న్యూస్ క్లిప్ను ఇన్స్టాగ్రాంలో ‘ దూకుడైన ఆటగాడు.. దయగలవాడు.. అందుకే అతనికి పడిపోయా.’ అనే క్యాప్షన్తో స్టేటస్ షేర్ చేసింది. ప్రస్తుతం ఈ స్టేటస్ స్క్రీన్ షాట్స్ నెట్టింట హల్చల్ చేస్తున్నాయి.