బోర్డర్‌ సరసన అలిస్టర్‌ కుక్‌
లండన్‌: పాక్‌ బౌలర్ల ధాటికి ఇంగ్లండ్‌ బ్యాట్స్‌ మెన్‌ తడబడ్డారు. లార్డ్స్‌లో గురువారం ప్రారంభమైన తొలి టెస్టులో ఇంగ్లండ్‌ తొలి ఇన్నింగ్స్‌లో 184 పరుగులకే ఆలౌటైంది. కుక్‌ (70; 14 ఫోర్లు), స్టోక్స్‌ (38) ఫర్వాలేదనిపించారు. అబ్బాస్, హసన్‌ అలీ చెరో 4 వికెట్లు తీశారు. అనంతరం పాకిస్తాన్‌ తొలి రోజు ఆట ముగిసే సమయానికి వికెట్‌ నష్టానికి 50 పరుగులు చేసింది.
అజహర్‌ అలీ (10 బ్యాటింగ్‌), హారీస్‌ సోహైల్‌ (11 బ్యాటింగ్‌) క్రీజులో ఉన్నారు. ఈ టెస్టు ద్వారా ఇంగ్లండ్‌ ఓపెనర్‌ కుక్‌ అరుదైన ఘనత సాధించాడు. టెస్టు క్రికెట్‌లో వరుసగా అత్యధిక టెస్టులు ఆడిన ఆస్ట్రేలియా దిగ్గజం అలెన్‌ బోర్డర్‌ (153) సరసన చేరాడు. కుక్‌ కెరీర్‌లో ఇది 155వ టెస్ట్‌ మ్యాచ్‌ కాగా... వరుసగా 153వది.
