బెల్జియందేనని ఎలుగెత్తింది!
క్రస్లోయార్స్క్‌: చిలక జోస్యం సంగతేమో కానీ ఫుట్‌బాల్‌ ప్రపంచ కప్‌ రాగానే ప్రతీ జంతువుకు జ్యోతిష్య హోదా కట్టబెట్టేస్తున్నట్లున్నారు! ఆక్టోపస్‌ నుంచి మొదలు పెడితే పిల్లి, డాల్ఫిన్, పంది వరకు అన్ని జంతువులు వరల్డ్‌ కప్‌ విన్నర్‌ ఎవరో తేల్చేస్తున్నాయి. తాజాగా ఈ కోవలో ఎలుగు బంటి కూడా చేరింది. ‘పామిర్‌’ పేరు గల 11 ఏళ్ల తెల్ల ఎలుగు బంటి ఇప్పుడు బరిలోకి దిగింది.
మంగళవారం జరగబోయే సెమీ ఫైనల్‌ మ్యాచ్‌లో ఫ్రాన్స్‌ను ఓడించి బెల్జియం విజేతగా నిలుస్తుందని పామిర్‌ చెబుతోంది. ఈ రెండు దేశాల జాతీయ పతాకాలు ముద్రించిన రెండు క్యాన్లను దీని ముందు ఉంచారు. వీటిలో బెల్జియంను పామిర్‌ ఎంచుకుంది. వీటిలో ఎన్ని నిజ్జంగా నిజం అయ్యాయనేది పక్కన పెడితే ‘వార్‌ ఆఫ్‌ వరల్డ్‌ కప్‌ ఎనిమల్స్‌’గా మారిపోయిందనేది మాత్రం చెప్పవచ్చు.
