న్యూఢిల్లీ: భారత్‌లో ఈ ఏడాది జరుగనున్న అండర్‌–17 ‘ఫిఫా’ ఫుట్‌బాల్‌ వరల్డ్‌ కప్‌కు సిద్ధమవుతున్న భారత యువ జట్టుకు ఘోర పరాజయం ఎదురైంది. రష్యాలోని సెయింట్‌ పీటర్స్‌బర్గ్‌లో జరుగుతున్న వాలెంటిన్‌ గ్రనాట్కిన్‌ స్మారక కప్‌లో భాగంగా రష్యా అండర్‌–18 జట్టుతో జరిగిన మ్యాచ్‌లో భారత అండర్‌–17 జట్టు 0–8 గోల్స్‌ తేడాతో ఓడిపోయింది. తొలి అర్ధభాగంలో రష్యా 5–0తో ఆధిక్యంలో నిలిచింది. ఆట రెండో నిమిషంలోనే గ్లష్కోవ్‌ చేసిన గోల్‌తో రష్యా ఖాతా తెరిచింది. ఆ తర్వాత కూడా రష్యా ఇదే జోరు కొనసాగించింది. ఇదే టోర్నీలో భాగంగా మంగళవారం బెలారస్‌తో భారత్‌ తలపడుతుంది.
