ముంబై: భారత ఫుట్‌బాల్ కెప్టెన్ సునీల్ చెత్రి ‘హ్యాట్రిక్’ గోల్స్‌తో చెలరేగడంతో ఇండియన్ సూపర్ లీగ్ (ఐఎస్‌ఎల్)లో ముంబై సిటీ ఎఫ్‌సీ సొంతగడ్డపై మరో విజయాన్ని నమోదు చేసింది. బుధవారం జరిగిన లీగ్ మ్యాచ్‌లో 5-1తో నార్త్ ఈస్ట్ యునెటైడ్ ఎఫ్‌సీని చిత్తు చేసింది. ముంబై తరఫున చెత్రి (25, 40, 48వ. ని.), నోర్డి (51వ ని.), బెర్టిన్ (87వ ని.) గోల్స్ చేయగా... బోతాంగ్ (29వ ని.) నార్త్ ఈస్ట్‌కు ఏకైక గోల్ అందించాడు. ఈ సీజన్‌లో ఇది రెండో హ్యాట్రిక్. చెన్నైయిన్‌కు చెందిన స్టీవెన్ మెండోజా... గోవాపై తొలి హ్యాట్రిక్ సాధించాడు. 10 పాయింట్లతో ముంబై ప్రస్తుతం పాయింట్ల పట్టికలో రెండో స్థానంలో ఉంది. గురువారం జరిగే మ్యాచ్‌లో అట్లెటికో డి కోల్‌కతా.. ఢిల్లీ డైనమోస్‌తో తలపడుతుంది.
