కోల్కతా: కామెంటరీ బాక్స్లో తన గురించి విమర్శలు చేసిన ఆస్ట్రేలియా స్పిన్ లెజెండ్ షేన్ వార్న్కు వెస్టిండీస్ బ్యాట్స్మన్ మార్లన్ శామ్యూల్స్ చురకలు అంటించాడు. తాను బ్యాట్తోనే సమాధానం చెబుతానని, మైక్తో కాదని అన్నాడు. ఆదివారం జరిగిన టి-20 ప్రపంచ కప్ ఫైనల్లో శామ్యూల్స్ 66 బంతుల్లో 85 పరుగులతో అజేయంగా నిలిచి మ్యాన్ ఆఫ్ ద మ్యాచ్ అవార్డు అందుకున్న సంగతి తెలిసిందే.
భారత్, వెస్టిండీస్ల మధ్య సెమీస్ మ్యాచ్ సందర్భంగా కామెంటరీ బాక్స్ నుంచి వార్న్.. శామ్యూల్స్పై కామెంట్స్ చేశాడు. 'నా గురించి షేన్ వార్న్ వరుసగా మాట్లాడుతున్నాడు. ఈ ఏడాది జనవరిలో ఆస్ట్రేలియాలో టెస్టు సిరీస్ ఆడినపుడు నాతో వార్న్కు ఇబ్బంది కలిగింది. ఏమిటన్నది నాకు తెలియదు. నేనెప్పుడూ అతన్ని గౌరవించలేదు. నా గురించి అతను మాట్లాడే పద్ధతి బాగాలేదు' అని శామ్యూల్స్ అన్నాడు.
