లంక...విజయ ఢంకా

శ్రీలంక అద్భుతం చేసింది. వివాదాలు, విమర్శలు, అనేక అపజయాల మధ్య దక్షిణాఫ్రికాలో అడుగుపెట్టిన ఆ జట్టు కొత్త చరిత్ర సృష్టించింది. సఫారీలను వరుసగా రెండో టెస్టులోనూ ఓడించి సిరీస్‌ను కైవసం చేసుకుంది. తద్వారా ఈ ఘనత సాధించిన తొలి ఆసియా జట్టుగా, మొత్తమ్మీద ఇంగ్లండ్, ఆస్ట్రేలియా తర్వాత మూడో జట్టుగా రికార్డులకెక్కింది. భారత్, పాకిస్తాన్‌లకు సైతం సాధ్యం కాని ఘనతను అందుకుంది. పతనావస్థలో ఉన్న తమ దేశ క్రికెట్‌కు కొత్త ఊపిరిలూదింది.   

పోర్ట్‌ ఎలిజబెత్‌: ఛేదనలో చేతులెత్తేయకుండా, దక్షిణాఫ్రికాకు ఏమాత్రం అవకాశం ఇవ్వకుండా శ్రీలంక రెండో టెస్టును గెలుచుకుంది. శనివారం ఇక్కడ మూడో రోజే ముగిసిన ఈ మ్యాచ్‌లో 197 పరుగుల లక్ష్యాన్ని ఆ జట్టు 2 వికెట్లు మాత్రమే కోల్పోయి అందుకుంది. ప్రత్యర్థి పేసర్లకు ఎదురు నిలిచిన యువ బ్యాట్స్‌మెన్, ‘మ్యాన్‌ ఆఫ్‌ ద మ్యాచ్‌’ కుశాల్‌ మెండిస్‌ (110 బంతుల్లో 84 నాటౌట్‌; 13 ఫోర్లు); ఒషాద ఫెర్నాండో (106 బంతుల్లో 75 నాటౌట్‌; 10 ఫోర్లు, 2 సిక్స్‌లు)లు మూడో వికెట్‌కు అజేయంగా 163 పరుగులు జోడించి లంకకు టెస్టుతో పాటు చిరస్మరణీయ సిరీస్‌ విజయాన్ని కట్టబెట్టారు.

‘మ్యాన్‌ ఆఫ్‌ ద సిరీస్‌’ కుశాల్‌ పెరీరా అద్వితీయ శతకం (153 నాటౌట్‌)తో తొలి టెస్టులో లక్ష్యాన్ని వికెట్‌ తేడాతో చేరుకున్న పర్యాటక జట్టు... రెండోదాంట్లో 8 వికెట్లతో ఛేదించి సిరీస్‌ను 2–0తో వశం చేసుకోవడం గమనార్హం. ఇరు జట్లకు గెలుపు అవకాశాలు సమాన దూరంలో ఉండగా, ఓవర్‌నైట్‌ స్కోరు 60/2తో విజయానికి 137 పరుగులు అవసరమైన స్థితిలో శనివారం బరిలో దిగిన లంక... మెండిస్, ఒషాద దూకుడుతో మరో 29.4 ఓవర్లకే పని పూర్తి చేసింది. మరోవైపు ఐదు వన్డేల సిరీస్‌లో భాగంగా తొలి మ్యాచ్‌ మార్చి 3న జొహన్నెస్‌బర్గ్‌లో జరుగుతుంది.