కొలంబో:రవిశాస్త్రి, యువరాజ్‌ సింగ్‌, హెర్ష్‌లీ గిబ్స్‌ వీరంతా ఒకే ఓవర్‌లో ఆరు సిక్సర్లు కొట్టిన వీరులు. అయితే తాజాగా భారత్‌ ఆల్‌ రౌండర్‌ రవీంద్ర జడేజా ఆరు సిక్సర్లు సాధించి వారి సరసన నిలిచాడు. సౌరాష్ట్ర టీ20 టోర‍్నమెంట్‌లో జడేజా ఈ ఫీట్‌ను సాధించాడు. కాగా, వీరిని తలదన్నేలా శ్రీలంకకు చెందిన టీనేజర్‌ ఒకే ఓవర్‌లో ఏడు సిక్సర్లతో చెలరేగిపోయాడు. ఇలా ఒకే ఓవర్‌లో ఏడు సిక్సర్లు కొట్టడం ఏ ఫార్మాట్‌ క్రికెట్‌లో ఇదే తొలిసారి కావడం విశేషం.
అండర్‌-15 మురళీ గుడ్‌నెస్‌ కప్‌ ఫైనల్లో భాగంగా ఎఫ్‌ఓజీ అకాడమీ తరఫున ఆడుతున్న నవీందు పహసర (89 బంతుల్లో 109) ఈ ఫీట్‌ సాధించాడు. ఒక బంతి నోబాల్‌ కావడంతో ఆ కుర్రాడు ఒకే ఓవర్‌లో ఏడు సిక్సర్లు కొట్టడం సాధ్యమైంది. లంక మాజీ స్పిన్నర్‌ మురళీధరన్‌ తన ఫౌండేషన్‌ తరఫున ఈ టోర్నీ నిర్వహిస్తున్నాడు. నవీందు అద్భుత ఇన్నింగ్స్‌తో కొట్టావాపై ఎఫ్‌ఓజీ విజయం సాధించి టైటిల్‌ ఎగరేసుకుపోయింది.
