డబ్లిన్ (ఐర్లాండ్): అరంగేట్రంలోనే అదరగొట్టిన భారత ప్రొఫెషనల్ బాక్సర్ విజేందర్ సింగ్ రెండో బౌట్‌లో తన విశ్వరూపాన్ని ప్రదర్శించాడు. డీన్ జిలెన్ (ఇంగ్లండ్)తో శనివారం జరిగిన బౌట్‌లో విజేందర్ తొలి రౌండ్‌లోనే ప్రత్యర్థిని చిత్తు చేశాడు. బౌట్ మొదలైన తొలి క్షణం నుంచే విజేందర్ పంచ్‌ల వర్షం కురిపించాడు. రైట్ హుక్, లెఫ్ట్ హుక్‌లతో జిలెన్‌ను ఉక్కిరిబిక్కిరి చేశాడు. తన కెరీర్‌లో పోటీపడిన రెండు బౌట్‌లలోనూ నెగ్గిన జిలెన్ ఈసారి మాత్రం తేలిపోయాడు. మూడు నిమిషాల నిడివిగల నాలుగు రౌండ్‌లపాటు ఈ బౌట్ జరగాల్సింది. అయితే విజేందర్ ధాటికి ఈ బౌట్ తొలి రౌండ్‌లోనే ముగిసింది.
