సాక్షి, న్యూఢిల్లీ: కొత్త ఫోన్ కొన్నప్పుడు బాక్సులో ఇకపై చార్జర్ ఉండదు! అవును. యాపిల్, శాంసంగ్ సంస్ధలు ఈ దిశగా అడుగులేస్తున్నాయి. ఇప్పటికే కొన్ని మొబైల్స్ బాక్సుల్లో ఇయర్ ఫోన్స్ ఇవ్వడాన్ని నిలిపేసిన ఈ సంస్ధల కన్ను ఇప్పుడిక చార్జర్లపై పడినట్లు తెలుస్తోంది. వచ్చే ఏడాది నుంచి వచ్చే కొన్ని ఫోన్ల బాక్సుల్లో చార్జర్లు లేకుండా పంపాలని శాంసంగ్ నిర్ణయం తీసుకున్నట్లు సమాచారం. (‘నేను అమెరికాకు ఎలా వెళ్లగలను?’)
యాపిల్ ఈ ఏడాదిలో తెచ్చే కొత్త తరం మొబైల్స్ నుంచే చార్జర్లు లేకుండా హ్యాండ్ సెట్లు ఇవ్వాలని నిర్ణయించుకున్నట్లు టెక్ వర్గాల బొగట్టా. వ్యయాన్ని తగ్గించుకునే ప్రయత్నంలో భాగంగానే ఇరు కంపెనీలు ఈ నిర్ణయానికి వచ్చాయని తెలిసింది.
ప్రస్తుతం యాపిల్ ఐదు వాట్లు, 18 వాట్లు సామర్ధ్యం కలిగిన చార్జర్లను మొబైల్స్తో పాటు అందజేస్తోంది. వీటిని సాధ్యమైనంత త్వరగా నిలిపేసి, 20 వాట్ల సామర్ధ్యం కలిగిన ఒకే ఒక చార్జర్ను మార్కెట్లోకి తేవాలని భావిస్తున్నట్లు సమాచారం. (రెమిడిసివిర్‌కు తీవ్ర కొరత)
ఏదేమైనా రెండు కంపెనీలు తీసుకున్న నిర్ణయం వల్ల పర్యావరణానికి మేలు కలుగుతుందని నిపుణులు భావిస్తున్నారు. ఫోన్ల ప్యాకేజింగ్లో మార్పులు, రవాణాకు అయ్యే ఖర్చు, చార్జర్లను ఎక్కువగా తయారు చేయడం వల్ల ఉత్పత్తి అయ్యే ఈ వేస్ట్ గణనీయంగా తగ్గుతుందని అంచనా వేస్తున్నారు.
ఇప్పటికే అన్ని ఫోన్లకు ఒకే రకమైన చార్జింగ్ మెకానిజమ్ ఉండే దిశగా యూఎస్బీ–సీ టైప్ను యాపిల్, శాంసంగ్, గూగుల్, మోటరోలా, సోనీ కంపెనీలు అడుగులు వేస్తున్నాయి. 2021 నాటికి పూర్తి స్థాయిలో సీ టైప్ చార్జింగ్ కలిగిన ఫోన్లను మాత్రమే ఈ కంపెనీలు ఉత్పత్తి చేస్తాయి.
మరి ఫోన్లకు చార్జర్ ఎలా?
ఫోన్లను కొనుగోలు చేస్తున్న వివియోగదారులే చార్జర్లకు అయ్యే ఖర్చులను కూడా భరించాలని టెక్ కంపెనీలు భావిస్తున్నాయి. అంటే ఫోన్తో పాటు చార్జర్ను ఎక్స్ట్రాగా కొనుక్కోవాలన్నమాట. చాలామంది యూజర్లు కొత్త ఫోన్లను కొన్నా తమ వద్ద ఉన్న పాత చార్జర్లనే వాడుతున్నారు. కొందరు థర్డ్ పార్టీ బ్రాండ్స్ ఏఎంఎక్స్ ల్యాబ్స్, యాంకెర్ తదితర కంపెనీల మల్టీ చార్జర్లను కొనుగోలు చేస్తున్న సంగతి తెలిసిందే.
