న్యూఢిల్లీ: ఉద్యోగాలు మారే వారి పీఎఫ్ ఖాతాలను ఆన్‌లైన్‌లో బదిలీ చేసే ప్రక్రియను ఈ నెలాఖరు నాటికి ప్రారంభించేందుకు రంగం సిద్ధమైంది. ఉద్యోగుల భవిష్య నిధి సంస్థ(ఈపీఎఫ్ఓ) ఈ సర్వీసుకు సంబంధించి నిర్వహించిన ప్రయోగాత్మక ఆన్‌లైన్ పరీక్షల్లో మంచి ఫలితాలు వచ్చాయని, ఈ నెల ఆఖరి వారంలో ఆన్‌లైన్ బదిలీ మొదలు కానుందని అధికార వర్గాలు చెప్పాయి. ఈపీఎఫ్ఓ సోమవారం నుంచి ఈ సర్వీసును ‘లైవ్ టెస్టింగ్’లో పరీక్షిస్తుందని, ఇందులో భాగంగా ఎంపిక చేసిన సంస్థల ఉద్యోగులకు పీఎఫ్ బదిలీ చేసుకునేందుకు అనుమితిస్తుందని చెప్పాయి. ఆన్‌లైన్ బదిలీ అందుబాటులోకి వస్తే ఏటా 13 లక్షల మందికి ప్రయోజనం చేకూరుతుంది.
