-
ఐదు పదుల వయసులోనూ పదుైనె దేళ్ల కుర్రాళ్లా కనిపించేదెవరు?
సాధారణ లారీ కంటే రెట్టింపు సైజు ట్రక్కులు నడిపేదెవరు?
తలపాగా మెలి పెట్టి మకుటం లాంటి తలకట్టుతో ఆకట్టుకునేదెవరు?
ఇంకెవరు... పరమ కష్టజీవులైన పంజాబీలే!
వాళ్లకు కావాల్సినవన్నీ డబుల్ ఎక్స్ట్రా అని తెలిసే
ఆ ప్రాంతాన ఐదు నదులు పారించాడా దేవుడు!
ఈ లెక్కన వాళ్ల వంటలూ ఐదింతల రుచితో ఉండాలి కదా!
కాబట్టే ఆరు రుచులనూ నోరారా, ఆరారా తినేలా చేస్తాయవి.
‘జనగణమన’లోని పంజాబ సింధు గుజరాత మరాఠాల్లో తొలిస్థానంలాగే
మన దేశీయ వంటకాల్లో పంజాబీ రుచులకే అగ్రపీఠం, శిఖరాగ్రస్థానం.
అందుకే... ఆ వంటలకు కిరీటంలా గౌరవమనే తలపాగాను చుడదాం రండి.
రుచుల కోటలో పాగా వేసి మనమూ కాస్త వాటిని ఆస్వాదిద్దాం పదండి.
తడ్కా భునా ఝింగా
కావలసినవి:
రొయ్యలు - అర కిలో; పసుపు - అర టీ స్పూను; ఉప్పు - తగినంత; నూనె - 4 టీ స్పూన్లు; టొమాటో తరుగు - కప్పు; ఉల్లి తరుగు - కప్పు; పచ్చి మిర్చి తరుగు - అర టీ స్పూను; టొమాటో గుజ్జు - కప్పు; గరం మసాలా పొడి - టీ స్పూను; కొబ్బరి తురుము - కప్పు; జీడి పప్పు పేస్ట్ - టీ స్పూను; కారం - టీ స్పూను; బటర్ - 10 గ్రా.; క్రీమ్- 10 గ్రా.; నిమ్మరసం - టీ స్పూను; కొత్తిమీర - ఒక కట్ట
తయారీ:
రొయ్యలను శుభ్రం చేసుకుని, పసుపు, ఉప్పు జత చేసి సుమారు అర గంట సేపు పక్కన ఉంచాలి
బాణలిలో కొద్దిగా నూనె వేసి కాగాక, రొయ్యలను వేయించి తీసి పక్కన ఉంచాలి
అదే బాణలిలో కొద్దిగా నూనె వేసి ఉల్లితరుగు, టొమాటో తరుగు, పచ్చిమిర్చి తరుగు వేసి గోధుమ రంగులోకి వచ్చేవరకు వేయించాలి
టొమాటో గుజ్జు, గరం మసాలా, కొబ్బరి తురుము వేసి కలపాలి
కొద్దిగా ఉడుకు పట్టిన తర్వాత జీడిపప్పు పేస్ట్, కారం, బటర్, క్రీమ్ వేసి కలపాలి
చివరగా రొయ్యలను వేసి బాగా కలిపి రెండు నిమిషాలు ఉంచి దించేయాలి
నిమ్మరసం జత చేయాలి
కొత్తిమీరతో గార్నిష్ చేసి సర్వ్ చేయాలి.
చూజ్ ఏ రోగన్
కావలసినవి:
చికెన్ లెగ్పీస్లు - 4; ఉల్లి తరుగు - అర కప్పు; టొమాటో తరుగు - అర కప్పు; గరంమసాలా పొడి - టీ స్పూను; బిర్యానీ ఆకు - 1; మిరియాల పొడి - టీ స్పూను; ఉప్పు - తగినంత ; కారం - టీ స్పూను; బటర్ - 50 గ్రా.; నిమ్మరసం - టీ స్పూను
తయారీ:
ఒక పాత్రలో తగినన్ని నీళ్లు, చికెన్ లెగ్పీస్లు, ఉల్లి తరుగు, టొమాటో తరుగు, గరం మసాలా పొడి, బిర్యానీ ఆకు వేసి ఉడికించి నీటిని వేరుచేయాలి
చికెన్ లెగ్పీస్లకి మసాలా పొడులు పట్టించి రెండు గంటలు నాననివ్వాలి
బాణలిలో బటర్ వేసి కరిగాక, చికెన్ లెగ్పీస్ల మిశ్రమం వేసి వేయించాలి
ఉప్పు, కారం వేసి కలపాలి
దించాక నిమ్మరసం కలిపి సర్వ్ చేయాలి.
నలీ కా సాలన్
కావలసినవి:
మటన్ బోన్స్ - అర కేజీ; ఉల్లి తరుగు - అర కప్పు; టొమాటో తరుగు - అర కప్పు; గరం మసాలా పొడి - టీ స్పూను; బిరియానీ ఆకు - రెండు; నల్ల మిరియాల పొడి - టీ స్పూను; ఉప్పు - తగినంత; పసుపు - అర టీ స్పూను; అల్లంవెల్లుల్లి పేస్ట్ - టీ స్పూను; కారం - టీ స్పూను; నూనె - రెండు టేబుల్ స్పూన్లు; ధనియాలపొడి - టీ స్పూను; జీలకర్ర పొడి - టీ స్పూను; నిమ్మరసం - పావు టీ స్పూను.
తయారీ:
కుకర్లో మటన్ను ఉడికించి పక్కన ఉంచాలి
బాణలిలో నూనె కాగాక ఉల్లి తరుగు, టొమాటో తరుగు, గరం మసాలా, బిరియానీ ఆకు, నల్ల మిరియాల పొడి వేసి బాగా కలిపి ఉడికించాలి
అల్లంవెల్లుల్లి పేస్ట్, ఉప్పు, పసుపు వేసి కలపాలి
ఉడికించుకున్న మటన్ జత చేయాలి
కారం, ధనియాల పొడి, జీలకర్ర పొడి వేసి కలపాలి
నిమ్మరసం వేసి సర్వ్ చేయాలి.
ముర్గ్ తుల్సీ టిక్కా
కావలసినవి:
బోన్లెస్ చికెన్ - పావు కిలో; అల్లంవెల్లుల్లి పేస్ట్ - టీ స్పూను; ఉప్పు - తగినంత; పుదీనా పేస్ట్ - టీ స్పూను; పచ్చి మిర్చి పేస్ట్ - టీ స్పూను; పెరుగు - లీటరు; గరం మసాలా పొడి - టీ స్పూను; ఆవ నూనె - రెండు టేబుల్ స్పూన్లు
తయారీ:
బోన్లెస్ చికెన్ని కావలసిన పరిమాణంలో ముక్కలు చేసుకోవాలి
అల్లంవెల్లుల్లి పేస్ట్, ఉప్పు, పుదీనా పేస్ట్, పచ్చి మిర్చి పేస్ట్, పెరుగు, గరం మసాలా, ఆవనూనె కలిపిన మిశ్రమాన్ని చికెన్కు పట్టించి గంట సేపు ఉంచాలి
అన్నిటినీ బాగా కలిపి అవెన్లో కానీ, తందూరీ పద్ధతిలో కానీ ఉడికించి సర్వ్ చేయాలి.
పనీర్ కుర్చాన్
కావలసినవి:
పనీర్ - 50 గ్రా.; గ్రీన్ క్యాప్సికమ్ - ఒకటి; నూనె - రెండు టీ స్పూన్లు; ఉల్లి తరుగు - అర కప్పు; టొమాటో తరుగు - అర కప్పు; పచ్చి మిర్చి తరుగు - రెండు టీ స్పూన్లు; టొమాటో గుజ్జు - కప్పు; గరం మసాలా - టీ స్పూను; బటర్ - 50 గ్రా.; క్రీమ్ - పావు కప్పు; చాట్మసాలా పౌడర్- టీ స్పూను; కారం - టీ స్పూను; మెంతి ఆకులు - రెండు టీ స్పూన్లు (ఎండినవి); ఉప్పు - తగినంత; అల్లం తురుము - టీ స్పూను; కొత్తిమీర - చిన్న కట్ట
తయారీ:
పనీర్ను చిన్న చిన్న ముక్కలుగా కట్ చేయాలి
గ్రీన్ క్యాప్సికమ్ను చిన్నచిన్న ముక్కలుగా కట్ చేయాలి
బాణలిలో నూనె వేడి చేసి, ఉల్లి తరుగు, టొమాటో తరుగు, పచ్చి మిర్చి తరుగు వేసి గోధుమరంగులోకి వచ్చే వరకు వేయించాలి
టొమాటో గుజ్జు, గరం మసాలా, బటర్, క్రీమ్, చాట్ మసాలా, కారం జత చేయాలి తరిగి ఉంచుకున్న క్యాప్సికమ్ ముక్కలు, మెంతి ఆకులు, ఉప్పు వేసి బాగా వేయించాలి
అల్లం తురుము వేసి బాగా కలిపి దించేయాలి
కొత్తిమీరతో గార్నిష్ చేసి సర్వ్ చేయాలి.
పంజాబీ చోలే బటూరా
కావలసినవి:
పెద్ద సెనగలు - 2 కప్పులు; ఉప్పు - తగినంత; నూనె - రెండు టీ స్పూన్లు; అల్లంవెల్లుల్లి పేస్ట్ - టీ స్పూను; పచ్చి మిర్చి పేస్ట్ - టీ స్పూను; వాము - పావు టీ స్పూను; చోలే మసాలా - టీ స్పూను; ఇంగువ - అర టీ స్పూను; టొమాటో గుజ్జు - అర కప్పు; కొత్తిమీర తరుగు - టీ స్పూను::: బటూరా కోసం...: పెరుగు - 2 టేబుల్ స్పూన్లు; పంచదార - టీ స్పూను ; ఉప్పు - తగినంత; పాలు - అర కప్పు; మైదా - అర కేజీ; బొంబాయిరవ్వ - 100 గ్రా.; నీరు - తగినంత; నూనె - వేయించడానికి తగినంత:::
తయారీ:
పెద్ద సెనగలను సుమారు ఎనిమిది గంటలు నానబెట్టి ఉడికించాలి
ఉడుకు పడుతుండగా ఉప్పు జత చేయాలి
బాణలిలో నూనె వేసి కాగాక, అల్లంవెల్లుల్లి పేస్ట్, పచ్చి మిర్చి పేస్ట్, వాము వేసి వేయించాలి
ఉడికించుకున్న సెనగలను జత చేసి, చోలే మసాలా, ఇంగువ వేసి కలపాలి టొమాటో గుజ్జు వేసి ఉడికించాలి
కొత్తిమీర తరుగుతో గార్నిష్ చేయాలి.:::
బటూరా తయారీ:
ఒక పాత్రలో పెరుగు, పంచదార, ఉప్పు, పాలు వేసి కలపాలి
మైదా, బొంబాయి రవ్వ జత చేసి చపాతీపిండిలా కలిపి రెండు గంటలు నాననివ్వాలి
చిన్న చిన్న ఉండలుగా చేసి పూరీలా ఒత్తుకుని కాగుతున్న నూనెలో వేయించి తీయాలి పళ్లెంలో చోలే, బటూరాలను అందంగా అలంకరించి సర్వ్ చేయాలి.
కర్టెసీ- ఓరీస్, బంజారా హిల్స్
చెఫ్ - నీలేష్ కుమార్
సేకరణ - డా. వైజయంతి
ఫొటోలు - ఎస్. ఎస్. ఠాకూర్