వేసవిలోను నిరంతర విద్యుత్‌

16 May, 2023 03:38 IST|Sakshi

అర్హత ఉన్న ప్రతి రైతుకు ఉచిత విద్యుత్‌ కనెక్షన్‌  

జగనన్న కాలనీల్లో విద్యుదీకరణ పనులు గడువులోగా పూర్తిచేయాలి 

33 కేవీ సబ్‌స్టేషన్ల పరిధిలో ప్రజాభాగస్వామ్యంతో కమిటీలు  

ఇంధనశాఖపై సమీక్షలో మంత్రి పెద్దిరెడ్డి రామచంద్రారెడ్డి

సాక్షి, అమరావతి: వేస­విలో విద్యుత్‌ డిమాండ్‌ అధికమవు­తున్నా ప్రణాళికాయుతంగా విద్యుత్‌ ఉత్పాదనను సాగిస్తూ, ప్రజలకు కోతలు లేకుండా విద్యుత్‌ సరఫరా చేస్తున్నామని రాష్ట్ర ఇంధనశాఖ మంత్రి పెద్దిరెడ్డి రామ­చంద్రారెడ్డి చెప్పారు. ఆయన సోమ­వారం సచివాలయంలో ఇంధనశాఖ, ఆంధ్రప్రదేశ్‌ మధ్యప్రాంత విద్యుత్‌ పంపిణీ సంస్థ (ఏపీసీపీడీసీఎల్‌) అధికారులతో సమీక్ష సమావేశం నిర్వహించారు. ఈ సందర్బంగా ఆయన మాట్లాడుతూ రానున్న రోజుల్లోను ఇదే తరహాలో విద్యుత్‌ సరఫరా కొనసాగుతుందని తెలిపారు.

33 కేవీ సబ్‌స్టేషన్ల పరిధిలో జవాబుదారీతనాన్ని పెంచేందుకు స్థానిక ప్రజాప్రతినిధులు, రైతులతో సబ్‌స్టేషన్‌ స్థాయి కమిటీలు ఏర్పాటు చేస్తు­న్నట్లు చెప్పారు. ఈ కమిటీలు తమ పరిధిలో విద్యుత్‌ డిమాండ్, లో ఓల్టేజీ, విద్యుత్‌ సరఫరా తదితర అన్ని అంశాలను పరిశీలిస్తాయని, మెరుగైన విద్యుత్‌ సరఫరాకు సహకరిస్తా­యని తెలిపారు. దరఖాస్తు చేసిన ప్రతి రైతుకు అర్హతే ప్రామాణికంగా ఉచిత వ్యవసాయ విద్యుత్‌ కనెక్షన్‌ ఇవ్వాలని, తొమ్మిది గంటలపాటు పగటిపూట ఉచితంగా విద్యుత్‌ సరఫరా చేయాలని ఆదేశించారు. ఉచిత విద్యుత్‌ దర­ఖాస్తులకు గడువు ఉండకూడదన్నారు.

ఇప్ప­టి­వరకు వచ్చిన దరఖాస్తులను జూన్‌ 15వ తేదీలోగా పరిష్కరించి కనెక్షన్లు మంజూరు చేయాలని చెప్పారు. మార్చి నెలాఖరు నాటికి వ్యవసాయానికి దాదాపు 1.20 లక్షల విద్యుత్‌ కనెక్షన్లు ఇచ్చినట్లు డిస్కం అధికారులు తెలి­పారు. జగనన్న హౌసింగ్‌ కాలనీలకు విద్యుదీకరణను గడువులోగా పూర్తిచేయా­లని మంత్రి కోరారు. పంపిణీ నష్టాలను పూర్తిస్థాయిలో నియంత్రణలోకి తీసుకురావాలని, పారిశ్రామికసంస్థల బకాయిలను వసూలు చేసేందుకు ప్రత్యేక డ్రైవ్‌ నిర్వహించాలని సూచించారు.

ఇప్పటికే పనులు అప్పగించిన సబ్‌స్టేషన్ల నిర్మా­ణాలను వేగవంతం చేయాలన్నారు. లో ఓల్టేజీ ప్రాంతాలను గుర్తించి సమస్య పరిష్కారానికి చర్యలు తీసుకోవాలని మంత్రి ఆదేశించారు. ఈ సమావేశంలో ఇంధనశాఖ ప్రత్యేక ప్రధాన కార్యదర్శి కె.విజయా­నంద్, ఏపీ జెన్‌కో ఎండీ కె.వి.ఎన్‌.చక్రధర్‌బాబు, సీపీడీసీఎల్‌ సీఎండీ జె.పద్మజనార్దనరెడ్డి పాల్గొన్నారు.

మరిన్ని వార్తలు