మరో 5ఏళ్ల పాటు ఇన్ఫోసిస్ ఎండీ, సీఈవోగా సీఈఓ సలీల్‌ పరేఖ్ కొనసాగనున్నారు. ప్రస్తుతం ఇన్ఫోసిస్ సీఈవోగా ఉన్న ఆయన పదవి కాలాన్ని కొనసాగిస్తున్నట్లు ఇన్ఫోసిస్ అధికారికంగా ప్రకటించింది. దీంతో ఈ ఏడాది జులై 1నుంచి 2027 మార్చి 31వరకు ఆయన తన పదవిలో కొనసాగనున్నారు. ఇక ఎప్పటిలాగే ఇన్ఫోసిస్ ఎక్స్‌ప్యాండ్‌ స్టాక్‌ ఓనర్‌ షిప్‌ -2019 ప్లాన్‌ లో భాగంగా ఆయనకు ఇన్ఫోసిస్ షేర్లను కట్టబెట్టనుంది.
ఇన్ఫోసిస్ ప్రకటన
మే 21న ఇన్ఫోసిస్ బోర్డ్‌ ఆఫ్‌ డైరక్టర్స్‌ మీటింగ్‌ జరిగింది. ఈ సమావేశంలో నామినేషన్‌ అండ్‌ రెమ్యునరేషన్‌ కమిటీ(ఎన్‌ఆర్సీ) సభ్యులు సలీల్‌ పరేఖ్‌ను మళ్లీ సంస్థ సీఈవోగా ఎంపిక చేయాలని నిర్ణయించారు. దీంతో పరేఖ్ ఈ ఏడాది జులై 1,2022 నుంచి మార్చి 31,2027వరకు పదవిలో ఉంటారని ఇన్ఫోసిస్ తన రెగ్యులరేటరీ ఫైలింగ్‌ తెలిపింది.
