సతమతం చేసే సైనసైటిస్‌ నుంచి ఇలా ఉపశమనం పొందండి..

14 May, 2022 15:20 IST|Sakshi

హెల్త్‌ టిప్స్‌

Sinusitis Home Remedies: ఎండాకాలం, వానాకాలం, శీతాకాలం అని లేకుండా చాలా మందిని పీడించే సమస్య సైనసైటిస్‌. తరచూ ముక్కులు మూసుకుపోతూ శ్వాస తీసుకోవడం కష్టంగా మారడం సైనసైటిస్‌ లో కనిపించే సమస్యల్లో ప్రధానమైనది. చికిత్స తీసుకున్నా తరచు తిరగబెట్టే ఈ సమస్యకు నివారణ మార్గాలు తెలుసుకుందాం.

వైరస్, బాక్టీరియా, ఫంగస్‌ కారణంగా వచ్చే సైనస్‌ వ్యాధి వల్ల ముక్కుతోపాటు గొంతు సంబంధిత సమస్యలు ఏర్పడతాయి. తలనొప్పి కూడా వస్తుంది. కొన్ని రోజులపాటు పట్టి పీడించే ఈ వ్యాధి నుంచి బయటపడేందుకు చిన్న చిన్న చిట్కాలు ఎంతగానో దోహదపడతాయి.

  • ఉల్లి, వెల్లుల్లి రేకులను తింటే సైనసైటిస్‌ బాధ తగ్గుతుంది. వంటకాల్లో ఉల్లి, వెల్లుల్లిపాయలను విరివిగా వాడితే మంచిది.
  • మామిడి పండ్లు లభించే కాలంలో వాటిని బాగా తినాలి. వీటిలోని ‘ఎ’ విటమిన్‌తో మిగతా ఔషధ గుణాలు సైనసైటిస్‌ వంటి ఇన్‌ఫెక్షన్లను నివారిస్తాయి.
  • టీ స్పూన్‌ జీలకర్రను వేయించి పొడిచేసి, అందులో రెండు స్పూన్ల తేనె కలిపి రోజుకు రెండు సార్లు తీసుకుంటే మంచి ఫలితం కనిపిస్తుంది. జీలకర్రను పల్చని కాటన్‌ వస్త్రంలో కట్టి వాసన పీల్చాలి.
  • 250 మిల్లీ లీటర్ల నీటిలో టీ స్పూన్‌ మెంతులను వేసి బాగా మరిగించి కషాయం కాయాలి. ఈ కషాయాన్ని రోజుకు నాలుగుసార్లు తీసుకోవాలి.
  • 300 మిల్లీ లీటర్ల క్యారట్‌ రసంలో 200 మిల్లీ లీటర్ల పాలకూర రసం కలిపి రోజుకు ఒకసారి తాగాలి.
  • దీర్ఘకాలంగా ఉండే సైనసైటిస్‌ సమస్యకు శాశ్వత పరిష్కారం లేదు.. అయితే కారం టీ సైనస్‌ నుంచి మంచి ఉపశమనం ఇస్తుంది. ఓ కప్పు మరిగించిన నీళ్లలో అర టీస్పూను కారం, రెండు టీస్పూన్ల తేనె, కొద్దిగా నిమ్మరసం కలిపి గోరువెచ్చగా రోజుకి రెండుసార్లు తాగితే సైనస్‌ నుంచి ఉపశమనం కలుగుతుందట. 
మరిన్ని వార్తలు