ఒట్టావా : కొద్ది రోజుల క్రితం కెనడాలోని డెల్టా పోలీస్‌ డిపార్ట్‌మెంట్‌కు చెందిన ఓ పోలీస్‌ అధికారి రోడ్డుపై నడుచుకుంటూ వెళుతున్నాడు. ఆ పోలీస్‌ అధికారిని చూసిన ఓ కారు డ్రైవర్‌ వాహనాన్ని రోడ్డు పక్కగా ఆపుచేశాడు. అనంతరం పోలీస్‌ దగ్గరకు వెళ్లి ‘‘ సార్‌! పంప్‌ హౌస్‌ దగ్గర రోడ్డు పక్కన ఓ కాలు తెగిపడి ఉంది’’ అని చెప్పాడు. దీంతో ఆ పోలీస్‌ అధికారి పంప్‌ హౌస్‌ దగ్గరకు వెళ్లాడు. అక్కడ తెగిపడి ఉన్న కాలు కనిపించింది. దాని దగ్గరకెళ్లి చూసి, ఆశ్చర్యపోయాడు. అదో బొమ్మ కాలని తెలిసి నవ్వుకున్నాడు. ( చిరుతకు ఝలక్: ఈ జింక చర్య ఊహాతీతం )
డెల్టా పోలీస్‌ డిపార్ట్‌మెంట్‌ గత మంగళవారం తమ అధికారిక ఫేస్‌బుక్‌ ఖాతాలో ఈ సంఘటన గురించి రాసుకొచ్చింది. ‘‘ మీ బొమ్మ ఎడమ కాలు పోయినట్లయితే.. డెల్టా పోలీస్‌ స్టేషన్‌కు వచ్చి తీసుకెళ్లండి’’ అంటూ ఫన్నీగా స్పందించింది. ప్రస్తుతం ఈ న్యూస్‌ సోషల్‌ మీడియాలో వైరల్‌గా మారింది. దీనిపై నెటిజన్లు.. ‘‘ ఆ డ్రైవర్‌ పరిశీలనా నైపుణ్యం అద్భుతం.. కామెడీ పీసు’’.. ‘‘ ఎడమ కాలు లేకుండా ఆ బొమ్మ ఎన్ని అవస్థలు పడుతోందో’’.. ‘‘ఆ పోలీస్‌ కాలినడకన పోయి కాలు కనుగొన్నాడు’’ అంటూ కామెంట్లు చేస్తున్నారు. ( వైరల్‌: సింహానికే వణుకు పుట్టించాడు )
