వాషింగ్ట‌న్‌: ఆటోపైలట్ మోడ్‌లో ఉన్న టెస్లా కారు చెట్టును ఢీకొట్టిన సంఘటన అమెరికాలోని టెక్సాస్‌లో చోటుచేసుకుంది. కారులో ప్ర‌యాణిస్తున్న ఇద్దరు వ్యక్తులు ఘటనా స్థలంలోనే మృతి చెందారు. సంఘటన స్థలాన్ని పోలీసులు పరిశీలించగా, కారులో ప్రయాణం చేస్తున్నప్పుడు డ్రైవర్ సీటులో ఎవ‌రూ లేరని తెలిపారు. డ్రైవర్ ప‌క్క సీటులో, వెనుక సీటులో కూర్చొన్న ఇద్దరు ఈ ప్రమాదంలో మరణించారు. కారు ఆటోపైలట్ మోడ్‌లో వేగంగా ప్ర‌యాణిస్తుండగా ఈ ప్రమాదం జరిగిందని పోలీసులు ప్రాథమిక నిర్ధారణకు వచ్చారు.
కారులో ఉన్న డ్రైవర్ సహాయక వ్యవస్థ సరిగ్గా పనిచేయక ఉండవచ్చునని పోలీసులు అనుమానిస్తున్నారు. ఈ నేపథ్యంలో టెస్లా కంపెనీ తన వెబ్‌ సెట్‌లో ఒక ప్రకటనను విడుదల చేసింది. తమ వాహనాలు పూర్తిగా ఆటోపైలట్ కాదని, డ్రైవర్ పరవేక్షణ కచ్చితంగా ఉండాలని కంపెనీ తెలిపింది. కాగా టెస్లా సెల్ఫ్‌ డ్రైవింగ్‌ కార్లు తరుచుగా ప్రమాదానికి గురవుతున్న సంగతి తెలిసిందే.
